منوعات

سجل عدلي

شو قال عم يقولولي انو جعجع مرشح للرئاسة؟ عن جد يعني؟ ما فهمت.. انو بيقدر؟ يعني مثلا سجلّو العدلي شو؟ بقصد شو مكتوب فيه؟ لا حكم عليه؟ يعني متلي متلو؟ أهه! طيب ليش ما بيكتبوا مثلا: «تعذر الحكم عليه»؟ مش منشان شي يعني، بس حتى يفرقوه عن الناس العاديين اللي متلنا. هلق صحيح انو متلو ومتايل، وانو يابا «خلص: ماضي ومضى».. بس هيدا تحديدا، من بين كل رفقاتو، ماضيه ما مضى!..

مع إنو، الماضي يعني، بدّو ومن كل قلبو، انو يمضي بقى ويروح بسبيلو. بس مش قادر. بقصد لو بس بيدّل أهالي المخطوفين على المقابر الجماعية وشو عمل بولادن .. إنو هه! عالقليلة! بس شكلو حياتي لا ندم ولا هاين عليه هالماضي يمضي هيك سلبي. بدو يصحح صورتو..لا مش بالندم وطلب السماح من الناس اللي اذاهن..بدو يتوّج حالو بالغار ويغنولو «يا مهيرة العلالي» على ماضيه تحديداً. وهيك صرلو من كام سنة عم يعيد تأهيل التاريخ، تاريخو، وبيصاقب دايما بيعمل احتفال تكريمي لشهدا القوات دغري قبل شو؟ قبل ذكرى صبرا وشاتيلا. حبيبي انت يا حكيم.. انو شو بيقول مثلاً للمحبذين وأشبال القوات بهيك احتفالات؟ بقصد للجيل الجديد يعني؟ هلق شو بدكن بانطوان زهرة «جامع الآذان» (ليكو هالكلمتين! الاتنين للإسلام!) انو يابا كنا بحرب وكان عم يدافع عن وجهة نظرو؟ ايه يطسّو بنظرو حياتي حتى ما يقدر بقى يقشع ولا زهرة و"ينخ" ليقطفها.
ايه طويلة! القصة القصة.. مزبوط، طويلة كتير!
وبهيك حركات وما في شرطة للتاريخ؟ بدها تطول اكثر.
بس كمان طويلة ع رقبتو.

فروسية

ماما مسطحة على الكنباية الطويلة قدام التلفزيون، وعم تتابع معي المسلسل الهندي «الهادف» «ملكة جانسي» وهيه ملكة من القرن الثامن عشر طلعت المحتلين الإنكليز من مملكتها. كان المشهد لما بيلتحم جيش الملكة "لاكشمي باي" بجيش ملكة اورشا الخاينة لاداي سكار، بالسيوف والفرسان على الاحصنة وبيدهم الدروع.
ماما: (كأنو عم تحكي مع حالها) «إيه هه! هيدي حرب. فيها فن ومبارزة. شفتي كيف؟ يعني كان فيها فروسية. مش متل هالأيام. (تسكت لحظة تم تضيف) هلق بيكبسوا زرار وبيبعتوا طيارات بدون طيار وبيقتلوا عالم هني وقاعدين ببيوتن. هودي عسكر هاو؟. هودي اسمن قتّيلين قُتلى».
ترتشف رشفة من كوب الحليب بالقهوة، وتتابع مشاهدتها للمسلسل ..عادي! كأنها لم تقل شيئاً!
حبيبتي ماما.


بيصور

دخلكن شو عاد صار بقصة بيصور؟ بقصد شو عاد صار بردينة ملاعب المعترة وزوجها ربيع الأحمد اللي فظعوا فيه الأخوة كارامازوف فوق؟ كيف تضبضبت هالقصة؟ مين ضبضبها؟ وشو بيقول القضاء؟ إنو إذا البنت خوفوها وسحب الشب لسبب أو لآخر دعواه، إنو ما فيها مثلاً حق عام هالجريمة الموصوفة؟ شو؟ ما بتعرفوا؟ طيب الله، مين قريب ع الرفيق شهيب ينط يسألو؟ فيدونا بس..

التعليقات
صورة المستخدم
1500 حرف متبقي
صورة المستخدم

مجهول - 9/29/2013 1:19:42 PM

تعطى الدكتوراه الفخرية كشهادة رمزية للمشاهير والرؤساء وبدون ان يكون لصاحبها علاقة بالعلم والمعرفة. مثل ذلك تماما هي براءة جعجع. سمير جعجع معه براءة فخرية. كان الهدف هو اخراج السلفيين فراح جعجع بالدوكة وطلع براءة معهم. ولكن ليس لبراءة جعجع اية علاقة بالبراءة مثلما ليس لاية شهادة دكتوراه فخرية نالها رئيس الجمهورية اية علاقة بالدكتوراه. فالمجرم المدان سيظل مجرم مدان والجاهل سيظل جاهل والعميل سيظل عميل حتى لو تصدقت الدولة بالبراءة على المجرم كما يفعلون في بعض الدول حين يطلقون سراح بعض المساجين بمناسبة العيد. ولو اعطيت شهادة طب لجاهل فهو لا يصبح طبيبا. وان سمي عميل شهيدا وسمي شارع باسمه فهل هذا يعني ان العميل لم يعد عميلا؟ اكيد سعد ابن ابو بهاء معه عدة شهادات دكتوراه فخرية وكما شاهدناه في خطابه الشهير فهو لا يعرف ان يفك الحرف او حتى ان يفك برغي. وبعد ما فعله اهل بيصور بابن عكار المسكين فان الدنيا كلها اخذت درسا في التقدمية والاشتراكية وفي حقوق العمال والفلاحين وسائر الفئات الخشبية التي سقطت من حسابات البيك بمجرد ان سقطت الغشاوة عن عينيه الفتاكتين ولحظه الجارح. كلها شخصيات هلامية رطراطة كانها مصنوعة من المهلبية والتي فيها نشاء اكثر مما فيها سميد وليس فيها اي ماء زهر يعطيها رائحة حلوة ولا مرشوش عليها من فوق فستق حلبي يعطيها بعض اللون. شخصيات وهمية ليست لها حتى ولو قيمة رمزية. وعلى سيرة رمزية الله اعلم شو اخبار رمزية بنت صفنا من ايام المدرسة الابتدائية. الله يوجه لها الخير لانها كانت ادمية وعاقلة وشاطرة بالصف بعكس كل من ذكرهم مقالك هذا الاسبوع يا ست ضحى.

اضف تعليق جديد
انقر للتصويت
صورة المستخدم
1500 حرف متبقي
صورة المستخدم

فيصل باشا/برلين فيصل باشا/برلين - 9/18/2013 10:41:41 PM

يحق له أن يطمح، إلا يوجد في كل منطقة لبنانية مأثر إنسانية وبصمات تركها جعجع،من أهدن إلى زحلة إلى الكورة الخ.؟ الم يقرب المسافات بينها عبر إلغاء قرى بكاملها،هو بالذات يكافأ على إنسانيته الفائضة وعلى احترامه للخصوصية اللبنانية،العابرة للطوائف والمناطق،فقد عمدها بالدم،بس ما حدا فهم عليه،هلق بتفهموا ليش الأطفال الرضع ببيت شمعون قتلوا وليش الأطفال ببيت فرنجية أيضاً قتلوا من اجل أن يصل الى هنا دون منافسين.ولماذا؟ وألف لماذا؟ يمكنمكم التواصل مع جعجع عبر مواقع المقابر الجماعية،ويستحسن الاستعانة بمحضر او محضرة أرواح لمعرفة المزيد عن أولادكم. بفتكر على انو: الموضوع بدو تعقل وتأمل وتبصر وحكمة كل هيدي كلمات بيستعملها جعجع انصحه أن يعمل على فهمها وما يترشح على الرئاسة،لان تاريخه لا يليق بالرؤساء،ولان هناك الكثرين من اللبنانيون اليوم (بايعنها بأشرة بصلة ) وكتير منن عندن طموح يعملوا حبيب الشرتوني. قال برتولد بريخت بما معناه : الناس السيئة لا تحب الزهور.فلا تصدقوا قصة الزهرة.

اضف تعليق جديد
انقر للتصويت
صورة المستخدم
1500 حرف متبقي
صورة المستخدم

اسبرانس دبس اسبرانس دبس - 9/18/2013 9:18:07 PM

ولك دخيل ربّك على هالأسلوب ... كلماتك الثاقبة الصائبة ... عم تطوّلي علينا يا ستّ الستّات. مع احترامي

اضف تعليق جديد
انقر للتصويت
صورة المستخدم
1500 حرف متبقي
صورة المستخدم

مجهول - 9/20/2013 10:17:20 AM

عزيزتي اسبرانس...شكرا كتير علي متابعتك .. بس والله عم اكتب اكتر من الاول بس يا رفيقة ما بدو الواحد يفكر ويستوعب حتي يكتب؟ يعني اللي عم يصير بمنطقتنا مش هوين هضمو..المهم: ممكن تعطيني ايمايلك تحت الهوا؟ هلق كيف تحت الهوا ما بعرف .. بس ايمايلي (ساطع يا بحر الليل) هوي [email protected] مودتي

اضف تعليق جديد
انقر للتصويت
صورة المستخدم
1500 حرف متبقي
شاركونا رأيكم