إملأ الفراغ بالبيض المناسب

(بالعامية)
-ما بعرف ليش يا زلمة.. حاسس هيك ضايقني صدري كتير!
-وانا كمان.. شو هيّن اللي عم يصير فينا؟ بعد في شي ما عملوه فينا هالعكار....
-(مقاطعاً) اوعى! هلق بيطلبوا منك تعتذر.. قول حيتان المال.
-بدك اياني احكي مكسيكي يعني؟
-حلّ عني الله يوفقك.. قلتلك متضايق. ما بعرف بس هيك .. حاسس بفراغ. فراغ كبير!
-فراغ؟ وليه؟ ما تكون ماروني انت؟
-(متفاجئا) يه! شو عرفك؟

-لأنو ما حدا غيركن حاسس بهالشي ..
-حاج يا زلمة! هلق بس المورانة حاسين بالفراغ؟
-ايه ..على علمي يعني. يمكن منشان هيك حبّ البطرك يسليكم ويسلينا بهالزيارة للاراضي المحتلة.. عفوا المقدسة.
-بس الرئيس لكل لبنان! يعني لكل الوطن. يعني هلق انت مش حاسس بفراغ؟
-لا والله.. ليش الكذب؟ حرام.
-(متخابثا) ايه لو صايرة مع رئاسة المجلس النيابي كنت حسيت بفراغ ما هيك؟
-غلطان.. شكلك ما بتعرفني: انا مع بري وسلام وسليمان و١٢٨ نائب ..حاسس بفراغ.. اصلا كل ما بيزيدوا بحس فراغ أكبر.
-كيف هاي؟ يعني لما بيكون زعيمكم قاعد محلو.. معناها حصتكم واصلتكن..
-بحياة الله؟ هلق خلينا نغض النظر عن «قاعد محلو»، ومين قال اصلا انو هيدا محلو.. وين شفت حصتي واصلتني؟ قصدك واصلتو؟
-مين؟
-هوي!
-كيف واصلتو؟
-ايه حصتنا واصلتو.. مش واصلتنا. في فرق كبير.. لأ؟
-(يتفكر) اهه!
-وانت شو طالع لك من الرئاسة؟ قصدي اذا هلق جابولك رئيس.. انو بيكفي يكون ماروني حتى تنبسط؟ يعني انو هالجرايد عم تكتب وبصراحة: هيدا طار ع فرنسا يتشاور، هيداك راح عالسعودية.. عمرة. وهيداك داعب ايران، وهوليك بعتتهم اميركا والسفير الفرنساوي قالها بالفصحى السورية: «نحن لا نتدخل ولكننا نفضل المؤسسات». يعني بهالجرسة العالمية، انتبه: إذا «حطولك» رئيس، رح يكون «سينييه»! وبتعرف انت "السينيه" غير الصناعة الوطنية! ساعتها يعني.. واذا ماروني؟
-(سكوت)
-اصلا حبيبي شو بيعمل الرئيس؟
- كيف شو بيعمل؟
-ايه؟ شو بيعمل؟
-ولو؟ رئيس.. يعني بيعمل كتير
-مثلا؟
-مثلا بيقبل اوراق اعتماد.. بيفتتح الحوار..بيصّدق قوانين.
-اكيد.. بس بيصدق كمان اشيا كتيرة تانية بتبطل القوانين اللي صدقها! بعدين عندو معلومات قوية.. انو بيصيرالقبان بدو بيضتين مثلا؟ كيف قبان وبدو بيضتين؟ ما فهمت! بيصيروا قبانين! لأ؟
-(علامات الانتصار على وجهه) وك له... مش هيك قصدو! هلق هيدا اللي فهمتو؟
-لكن شو؟
-بيقصد بدنا رئيس رجّال!
-آآآآآآه! هلق فهمت. (يصمت ثم يقول ) غريب بتعرف؟ المصاروة كمان قالوا: بدهم رئيس دكر! السوريين ما بيقولو بدهم رئيس بيقول بدنا بشار..
-كيف هاي
-ايه والله. يعني كيف انت بتقول للمحارم بدي كلينكس؟ هني هيك. بيقولو بدنا ننتخب بشار، مش بدنا ننتخب رئيس! يعني اسم نوع مش اسم علم..
-(يقهقه)
-هيدي ضحّكتك ما هيك؟ لو ع بندر ما ضحكت! وليه؟ شو صايرلكم بهالمنطقة؟ شي دكر وشي بيضتين.. وشي الرجل الرجل.. ما عم افهم هالتأكيد كلو لشو؟ ليش امتين انتخبنا مرا؟ العمى .. معقولة يمزح هيك مزحة قدام العالم؟ طيب مثلا شو قالت اليس شبطيني .. كانت حاضرة ما هيك؟ انا شفتها.
-ما بعرف! ليش اصلا شو بتعمل مرا بهيك محل؟ شو طلعها؟
-ما هيه وزيرة المهجرين! هوي حطها وزيرة..
-ايه ضروري تطلع وتعرّض حالها لهيك مواقف؟
-هيه فكرها طالعة مع رئيس الجمهورية.. عارفة بشو رح يداعب الحضور؟ معقول انك حاسس بفراغ منشان اشخاص من هالنوع؟
-اكيييد.. ما هوي رايح. مين بدو يجي؟
-وانت شو فرقت معك؟ انت ماروني صحيح .. بس من عكار ولا انا غلطان؟
-شو يعني؟
-(غاضباً) يعني قوم انقبر، شوف وين في مظاهرة لهيئة التنسيق وامشي معهن. هونيك، وساعتها.. بس، بتوصلك حصتك وبتصير بني آدم. فهمت يا قوي يا دبيك؟.

التعليقات
صورة المستخدم
1500 حرف متبقي
صورة المستخدم

مجهول - 5/22/2014 1:20:00 PM

بصراحة وبمنتهى الصراحة ، أنو فكّرتي شي مرّة لو مافيه هالزعما كيف كانت الحياة جامدة وناشفة ع الآخر ؟! كيف كان طلع معك هيك مقال أو مع غسّان سعود مقالات تعالج الاكتئاب ، صحيح من ميلة الاكتئاب عم يجينا من هالزعما بس من ميلة تانية كل النكات والمقالات الممتعة واللي بتخلينا نبتسم كمان هيي بسبب هالزعما هني ذاتن ،،، بجد بجد كيف تكون الحياة بدون هالزعما ، حاولي تتخيّلي الحياة بشي مقال بدونهم وياريت تستلميهم واحد واحد وتتخيلي القصّة ،، ناطرينك

اضف تعليق جديد
انقر للتصويت
صورة المستخدم
1500 حرف متبقي
صورة المستخدم

مجهول - 5/22/2014 3:36:45 PM

بس فكر معي يا صديقي المجهول: لو ما في مين يكتب هالمقالات بس الباقي، يعني اللي هم نكتب عنهم ، متوفرين وبكميات عائلية. شو بتعمل؟

اضف تعليق جديد
انقر للتصويت
صورة المستخدم
1500 حرف متبقي
صورة المستخدم

مغتربه مغتربه - 5/22/2014 6:58:02 AM

حوار رائع أضحكتيني من قلبي. مخيلتك لا حدود لها، عن جد شو جايينا من هيك رؤساء وزعامات والخ ؟! وعلي شو أنا شخصيا متحمسه لأخبار هذا البلد..هيك هيك ما في أمل منه ولا أمل ان أعود يوما . قال وطن قال

اضف تعليق جديد
انقر للتصويت
صورة المستخدم
1500 حرف متبقي
صورة المستخدم

مجهول - 5/21/2014 5:24:00 PM

بجد ضحكتينا واحنا عيًانين... الله يقويكي ويكتر من امثالك ويقلل من امثال حيتان المال ورؤسا الكلينكس والهوفر... من شو بتشكي الهوفر؟

اضف تعليق جديد
انقر للتصويت
صورة المستخدم
1500 حرف متبقي
صورة المستخدم

ضحى شمس ضحى شمس - 5/22/2014 10:01:29 AM

صحيح... نسيتها هاي :الهوفر! ممتازة. شكرا للتذكير.. بوعدكن باعتمادها بالمقالات الجايه. الله يخليلي هالقراء

اضف تعليق جديد
انقر للتصويت
صورة المستخدم
1500 حرف متبقي
شاركونا رأيكم