الفتنة كلها نظر

-هلق ما فهمت.. شو المشكلة بحرق علم داعش؟
-كيف يعني؟ ولو؟ لانو مكتوب عليه لا اله الا الله!
-وايه؟ شو يعني؟
-كيف شو يعني؟ مكتوب اسم الجلالة واسم النبي عليه!
-بس هيدا علم داعش! واكيد لا ربنا ولا النبي راضيين عن استخدام داعش لاسمهم. انو وشو يعني انحرق علم؟ بقصد لشو هالتهييج كلو؟ يعني اذا كتب نتنياهو على ضهرو لا اله الا الله، ما بيعود فينا نلمسو؟
-بس ما تنسى انحرق بالاشرفية؟
-المغزى؟
-(يغمز بعينه متواطئا)انو اللي حرقوه (يخفض صوته) مسيحية. انو مسيحية عم يحرقوا علم اسلامي..

-هيك لكن؟ وله؟ بهيم انت شي؟ شو الفرق بين علم داعش وعلم اسرائيل؟ مش طول عمرنا منحرق علم اسرائيل؟ والعلم الاميركي؟ هلق لو طايلين نحرق الاسرائيلية شخصياً، او جماعة داعش ..طبعا بيكون عز الطلب.. بس لما ما بيكون فينا، بيحرقوا العلم كنوع من فشة الخلق. ع اساس هيدا رمزهم.
-بتعرف؟ صحيح.. معك حق. واصلا هني ما كانوا كتار ..
-مين؟
-اللي حرقوا العلم بالاشرفية. انا كنت هونيك..يعني كانوا شي "جلعوطين" تلاتة .. وبعدين هالشي صار عملوها من زمان مش وقت اللي حكي ريفي.
-ليه شو قال ريفي؟
-ما سمعته؟ قال انو هيك اشيا مش منيحة لانو بتعمل فتنة
-ريفي؟
-ايه
-ما غيرو وزير العدل
-ايه
-خايف يعمل فتنة؟
-شو باك؟ ايه ايه
-ريفي؟
-وك شو مالك؟ الهيئة تلتت!
-هلق فهمت!
-شو فهمت؟
-فهمت انو الفتنة راجعة.. صار الموسم
-لا سمح الله خيي.
-ح يسمح ح يسمح. ما الوزير حذر؟ الهيئة بعدكن ما عم تفهموا ع الوزير
-كيف يعني؟
-يعني لما بيحذر بيكون عم يلفت الانتباه
-اكيد. وواجباته كمان انو يلفت نظر المواطنين انو هيك تصرفات بتعمل فتنة..
- هلق هوي عم يلفت النظر. صحيح. بس نظر مين يا ترى؟ نظر الناس ولا نظر الفتنة؟ هون السؤال. فهمت يا كبير؟ يا متابع انت.. الله يخليك لامك.

التعليقات
صورة المستخدم
1500 حرف متبقي
صورة المستخدم

مجهول - 9/12/2014 2:24:05 AM

طيب في ناس زعلت لأنو انحرق علم عليه اسم الله ،،، من مين لازم نزعل لما بينقطع رأس وهم يصرخون الله أكبر أو بيدكوا الهاون وهني عم يصرخوا الله أكبر !!!

اضف تعليق جديد
انقر للتصويت
صورة المستخدم
1500 حرف متبقي
صورة المستخدم

مجهول - 9/8/2014 1:22:10 PM

بكل احترام هذه المرة جانبك الصواب ست ضحى... ربما أنت علمانية لكن مع ذلك يتعين احترام مشاعر المتدينين. نعم أنا ضد الطائفية بقوة، بس لا يجوز المساس بمقدسات المسلمين من أي أحد وخاصة من طائفة أخرى في بلد محتقن -بل مختنق- بالطائفية (أذكرك هنا بحادثة الأحذية التي اعتبر الأخوة المسيحيون أنها تهين مقدساتهم منذ فترة)... وحتى وإن كان حق يراد به باطل فما قاله ريفي فيه وجهة نظر، هناك الكثير ممن يمكن استثارتهم بهذا المشهد وأنتم أدرى. بعدين وفي سياق التشبيه الذي أوردتيه، هل يجوز مثلاً أن نحرق القرآن لأن داعش يقدسونه؟؟ يجب الحذر الشديد خصوصاً في هذه الفترة ولمصلحة الجميع. حفظ الله الجميع من كل شر.

اضف تعليق جديد
انقر للتصويت
صورة المستخدم
1500 حرف متبقي
صورة المستخدم

مجهول - 9/5/2014 9:18:29 AM

انشالله تكوني غلطانة تحياتي

اضف تعليق جديد
انقر للتصويت
صورة المستخدم
1500 حرف متبقي
صورة المستخدم

اريتري محتال اريتري محتال - 9/5/2014 4:43:57 AM

إنو أخر مقالة كانت باربعة اغسطس، والتالية بأربعة سبتمبر، يعني شهر كامل بين المقالتين. مابينفع ست ضحى. شهر كتير. هذه اسمها مدونة يعني ع طول ترغب في كتابة لها. عايزنها على طول مفتوحة على الكتابة الحلوة . رجاءً

اضف تعليق جديد
انقر للتصويت
صورة المستخدم
1500 حرف متبقي
صورة المستخدم

مجهول - 9/5/2014 11:22:00 AM

مين قال؟ المدونة شي تقريبا شخصي (لانو بالجريدة مش فاتحة ع حسابي). وبما انو.. بحب قللك انو القرف ضارب اطنابو. يعني صرلي راجعة ع لبنان عشرين سنة. شو بدي خبرك؟ ما ضل شي ما كتبنا عنو مرة واتنين وخمسة وعشرة.. وك تصور اني غطيت ٤ حروب ببلدي شخصياً. ومع ذلك... كل شي بيروح ... وبيرجع: من الطائفية للفساد للعمالة لضرب النقابات لضرب كل مقومات الشخصية الوطنية: من اللغة العربية للمدرسة الرسمية للمؤسسات الخ.... كيف بدك ايانا نضاين ويكون النا نفس نحكي ونحنا عم نعيد ونزيد وهني كمان ما بيكلوا ولا بيملوا من الفجع وعهر الفساد؟! تعال ع لبنان واذا قلك نفس بعد البقاء لشهر كامل انك تقوم الصبح وتبزق بوجهك رح خليك تبزق بوجهي.. مودتي

اضف تعليق جديد
انقر للتصويت
صورة المستخدم
1500 حرف متبقي
صورة المستخدم

مجهول - 9/5/2014 2:04:00 AM

يا ست ضحى اذا نحنا بدنا نحرق الاسرائيليين بيطلع معنا ان داعش عملت شي منيح انها دبحت ستيف ستلوف لانه اسرائيلي ؟؟ وحسب يديعوت احرنوت هالستلوف خريج مركز هرتسليا للدراسات الاستخباراتية . سؤال بتمنى اذا عندك وقت تعطيني جواب عليه بالعادة الصحافيين بيعتبروا الصحافي مقدس ويحرم الاعتداء عليه هل هالشي بينطبق على ستلوف ؟؟

اضف تعليق جديد
انقر للتصويت
صورة المستخدم
1500 حرف متبقي
صورة المستخدم

فيصل باشا/برلين فيصل باشا/برلين - 9/5/2014 11:51:20 AM

اقرآ يا اخينا الاخبار اولاً، لماذا قتل سوتلوف؟ هل لانه اسرائيلي؟ ،لا اعتقد فبالنسبة الي لا ارى فرق بين داعش والنصرة الا بقدر الفرق بين حزب العمل والليكود، فجميعهم يقتلون بنا ويدمرون، ويطبقون التلمود وان اختلفت الراية، اوالتسميات، فهم مثلاً في الجولان اخوة ورفاق سلاح. فداعش والنصرة وبعض من الحر يقوموا بحماية حدود اسرائيل، فآن تم احراق علم اسرائيل او النصرة او داعش فهذا تعبير عن الغضب الذي يعتري الناس من اجرامهم، وهل كان الشهيد الرقيب علي السيد اسرائيلي؟ هم ذبحوا سوتلوف، كونه اميريكي، ولو علموا انه اسرائيلي لم قاموا بقتله، وهل هناك فرق، آميركي اسرائيلي او اسرائيلي امريكي،او داعشي متصين فكلهم بذبحنا واحد. وقد ورد بالشريط الذي عرض يدين المسلح الملثم الهجمات الأمريكية على "الدولة الإسلامية" ويقطع عنق سوتلوف. ثم يعرض رهينة آخر بريطانيا متوعدا بقتله، والكونغرس يطالب أوباما بخطة للتصدي لداعش بعد "مقتل" سوتلوف. وربما امريكيا طلبت بذبحه لايجاد المبررات للتدخل بسوريا والعراق، وربما قريباً بالبنان.

اضف تعليق جديد
انقر للتصويت
صورة المستخدم
1500 حرف متبقي
صورة المستخدم

نوال / ألمانيا نوال / ألمانيا - 9/4/2014 5:06:00 PM

روحي يا ضحى سيري وعين الله ترعاكِ بدي ألفت نظرك بدون غمز ولمز !!الله يكون معك ويحميكي بس : انتبهي عاحالك ! وحياتك دواعش الداخل أدهى وأخطر وأشرف !!

اضف تعليق جديد
انقر للتصويت
صورة المستخدم
1500 حرف متبقي
شاركونا رأيكم