خلّونا يا جماعة نحاول نحصر هالكمالة اليوم لمقالين قبل لأنو هيدا نوع من البحث إللي عادة ما بينفات فيه بمقال، صراحة. إنما هلق فتنا وحصل، المهم نعرف نطلع. في حقيقتين، واحدة من صنع الانسان، وواحدة من صنع الطبيعة. الحقيقة الاولى: كل منتَج إلو سعر إجمالي بيقررو البياع ـــ هالسعر مؤلف من: سعر الكلفة + أتعاب اليد العاملة + ربح البياع ـــ هلق سعر الكلفة سِرّ علينا نحنا وعالطبقة العاملة، اللي عاملتو للمنتَج، تصوّروا. وليش سِر؟ لأنو اولاً أجور الطبقة العاملة مش بس معروفة، أشهر من أن تُعرَّف لأنها دايماً أوطى أجر ممكن قبل ما تقوم القيامة وتتحرك لا سمح الله هاليد العاملة او تعترض او تأضرب.
فإذا بهالظروف انعرف بالغلط سعر الكلفة، والأجور أشهر من ان تُعرَّف، بينعرف دغري شو ربح البيّاع!!! وهيدا اللي ممنوع! عادة الإنسان ليش بيخبّي تفصيل عن المجتمع؟ لانو بيشعر إنو إذا انكشف هالسرّ، رح المجتمع ينزعج بشي طريقة، وهالطريقة ما فيه يضمن نتايجها، وهو أقلية، فبيخاف إنو ربحو اللي مناسبو هو وحدو، وعادة ربح كبير، وهو كإنو مستحي فيه، ليه؟ لأنو في زعبرة بمحل معيّن: طبعاً ما دام مبلشين بسرّين من أصل 3 أرقام، هاي إذا ما في غش بالمواد المصنوع منها المنتَج، يعني منصير بسرّين وكذبة. بيعرف الرأسمالي إنو الغريزة الانسانية إذا عرفت بربحو رح تقول: ليش هو بس مش نحنا كمان؟
الحقيقة التانية: الطبيعة خلقت الإنسان بمتناقضين أساسيين. الاول: الأنا اللي هيي بتعميه إذا تركها بدون ضابط العقل اللي بيميزو عن الحيوان. لكن في حد الانا عكسها تمام، أي: الرغبة الغريزية بالمساواة. أي إنو ما بيفهم ليش غيرو عندو شي معيّن وهو لأ... قليلة! الأنا اللي مختَصَرها «أنا أول شي»، والمساواة اللي مُختَصَرها «كلنا متل بعضنا». يعني في بالإنسان بزرة للرأسمالية، وبزرة للاشتراكية. اكيد إنو التانية إنسانية أكتر لانها إجت بعد غريزة الانا الاولى. يعني تَطوّر. يعني بس وِعِي الإنسان إنو غيرو كمان عندو «الأنا»، وإذا صرنا ألف، منصير ألفX أنا، فشو منعمل ساعتها؟ متل ما عملنا من آلاف السنين؟ مناكل بعضنا؟ او منقتل بعضنا؟ ما هاي مراحل اختبرها الإنسان، وفضّل بسبب غريزة تانية مشتقة من «الانا»، وهي غريزة البقاء، فضّل السلم على الحرب، والتفاهم على النزاع. ونظّم هالكذا مليار X أنا، بإطار صاروا فيه: انا واحدة كبيرة. وهي الـ»نحنا»... طيب كل الناس راضيين ودايما موافقين إنو كل شي موجود لإلهن كلهن، إنو شو منعملّو فيهن لرأس المال، خاصة إذا مش راضي عن النتيجة هاي اللي وصلها المجتمع البشري؟ بعدين ليه دايما رب العمل بيعرف شو نحنا منطلّع مصاري بس العكس ممنوع؟ ما في جواب غير إنو اللي بيطلّعو رب العمل، بيهوّش الكلاب وبيهستر الأحصنة إذا فهموا، وبيهيّج الأسودة والنمورة والدبب إي والله. إنو معقولة فروقات المداخيل اليوم وين ما كان بالعالم؟ وليش اللي بيطلّع هلقد مصاري حاسس بالخوف... في ذنب مخفي! شخص عايش عا استغلال جهود الشغيلة وهو بيعرف وأكيد إنن بيستاهلوا أكتر، بس إذا دفعلهن بشكل عادل هولي رح يروحوا منو. وانتبهوا، بيكره حدا يتّهمو بالاستغلال، لانو هيدا شي هو مجبور يعملو وإلا رأسمالو ما بيكبر، إنو شو بدّك يقلّك؟ ما بيقدر إلا ينكر ويكرهك بعد اكتر، وإذا صرلو بس تجي الزودة ما يزدلك. فَحِلّ عنو، الثورة هيي بكرا بتحلها بالفعل، مش بس بالاتهامات. بالمحصلة النهائية، إجت الاشتراكية وَعَدِت إنو بمركزية رأس المال، ضمن جهاز مركزي إسمو دولة، قادرة تأمّن بالبداية، عالقليلة، الكمية ولكل الناس او أكبر عدد ممكن. وبعدين بتبلش تطلع بالنوعية واللي هيي لازم تكون: نوعية X كمية. وبلّشت وتعثّرت، بس معليش، التاريخ بعد ما خلص بعكس ما قال أخونا فوكوياما... أما الرأسمالية، فشو عِمْلت لهلق؟ لا نوعية بعد اليوم، وطبعاً آخر همومها الكمية لأنو بمفهومها: دوماً الكمية محدودة.
6 تعليق
التعليقات
-
وقمح وشعيرCapitalismفقط تصديقاً لكلامك استاذ زياد http://www.foreignpolicy.com/articles/2011/04/27/how_goldman_sachs_created_the_food_crisis
-
شو المهم؟شوف هالإسم ..رأس المال! مهو لتقطع راس هالمال ومابدك تقطع لقمة عيشك.. ممكن تصير .. يرجى مراجعة كتاب رأس المال في القرن الواحد و العشرين
-
سعر تكلفة الآي فونسعر تكلفة الآي فون 188دولار iPhone 6 Plus (16GB) سعر المبيع هو( 749 Dollar (in thee USA). قديش عندك ربح كتير واقل شي سعر اليد العاملة بالصين، وعندك x من الناس بيشتروا يعني النوعية يلي معها مصاري، ونوعية تانية ما معها مصاري كمان بتشتري (برستيج) يعني سياسية شركة ابل تعتمد عن النوعية مش ع الكمية مع انو ما بيتاكل. وعندك الشوكلاه مثلا الغرام الواحدة يساوي سعرغرام الذهب. والاتنين كماليات يلي معو بيقرش ويلي ما معو بيمضيها تمضاية ويلعن الرأسمالية. إلانا من صنع الطبيعة والطمع من صنع البشرية.
-
خيي زياديقبرني ربك يا زياد , هيدي المقالة الأم في كشف حقيقة الفرق بين الإيرادات والمعاشات , لك فشيتيلي خلقي , أنا ما بهمني لا الرأسمالية ولا الإشتراكية , بدنا الحق والعدالة , حق الإنسان ما ينظلم , بتروح لتشتغل بقلك 500$ بالشهر وهوي عم يطلع على ضهرك 500,000$ بالشهر, وين العدالة ؟ وما بيستحي وضميرو مرتاح بالرانج روفر 2014 والفيلا الدلوكس , وإنت بترجع على الضاحية , على شقتك المتواضعة بالسرفيس أو بالفان , هلق أنا عندي عتب على الناس العاديين كمان , بس رح أجّلو إلى وقت آخر , تعليق إضافي إلزامي : أنا إنسان ملتزم دينياً , بس بحب الملحدين , لأنهم عم يفتشو على الحقيقة وعم يفتشو على العدالة , المشركين تبع أيام زمان , كان ربنا يدمرهم لأنهم كانوا شركاءالحاكم الظالم بفسادو وإجرامو مش لأنهم ما بيؤمنوا فيه , هلق صار عنا مؤمنين بالله وهني شركاء الحاكم الظالم , ربنا لا يعبئ بهؤلاء المؤمنين ولا بسجودهم ولا ركوعهم , ربنا مع العدالة والحق , عشان هيك , في إنسان إسمو موجود مع القديسين والصالحين , إسمو تشي غيفارا , وربنا هيك بدو مش أنا !
-
أنا و لا أحدعند الرأسمالية مختصر الأنا هو "أنا أو لا أحد" و بالأحرا "أنا و لا أحد" و أوعا يخف ربحن لا سمح الله و هوايتن يتضحكو على "الزنود" أي العمال المعترين و عاملين حساباتن ليخفضو الأجور و يحافظو على جيش العمال الإحتياطي ، و بنفس الوقط محسسينو إنهن هنّي المساكين و عم يشتغلو كل هل شغل لصالح العمال . أما بخصوص النوعية والإحتكار فهيدة هي القاعدة الأساسية تيزيد الربح و يزيد رأس المال و يرع ينخفض رأس المال المتغير و تزيد البطالة.. صح إنو موضوع كبير على مقالة بس مهم كتير ناس يقرو خاصةً اللي ما إلن جلادة يقرو كتاب كبير شوي متل "رأس المال"
-
BEY - JEDDAH - ECONO محجوز اونلاينبآخر السطر نقطة: بعدني علقانة 1902.انت انبحيت شو بينعمل وانا انبحيت لحتى افهم واحفظ وكمان ما صدقت كل المسخرة بأنك راعي الرأسمالية المتحضرة.انت كنت حلو وما بتحب الطلاق فعملت زواج كنسي بين الكلمة والفعل وحلو اكتر لمن طلعت من قصة الأجر والظروف ووصلت لعندي انا البني آدم.طلعني نفسيا من المتراس اللي وقع لأنو مثلا كان الوأ ومن صورتك لمن ركضت طيارة وزتيت المانيفستو بقفا ضهرك.كنت سريع لدرجة ركبو على ضهرك ليوصلو معك بسرعة.ليش كان كتابك بيحكي عن سرعة الضو مش عن الضو اللي بيعمي؟ شو كان معون بقلب الخزان لمن ما دقوا وفطسو؟ وصلنا لهون ومش مختلفين ابدا ومنسأل منعمل نفابة أو لأ ومنرجع مننقسم مين اللي مع أو اذا اللي برات وهني اكتر, هودي هني اللي منمشي فيون؟ بشوف الحل تاني والمانيفستو خليه ابيض لحتى ما حدا يعلق ونعلق بقلب الكلمة. بشوف الحل انو, ومن وجهة نظري وبعدني محل ما تركتني, جاي لحالو لأنو هيدا ابن خلدون تفلسف من قلب الطاقةوعم تظبط معو ولانو يمكن انت ما تعبت بعد بس انا تعبت واحترق نفسي وابني مصيرو عالخليج ومن هيك الله الله بعبادو. اللي بقدر اعملو اني استناك بقلب الكلمة من جوا لانك جاي ويلعن سرعة الضو واللي بتقدر تعملو انك تضلك تكتب لحتى ضلني, قبل ما لم حالي على الشغل صبحية, اقرا.احسن من انو لمن انت تجي ما كون نسيتك او اتفاجأ بمجيتك وانقز.خلاصة كلمات القلب من على نفس الصوفا ومش عن التلةوما في هوامش.بقدر فكر اذا وصلو محل ما لازم يوصلو؟.