- يا أخي مش قلتلك المرة اللي مرت إسمي عائد؟ شو مالك ما عم تفهم؟-إيهي علينا! بدك كل مرة تقعد تتفلسف علينا بهيدول الحكيات؟
-ايه وكل مرة رح أضل احكيهن! كل مرة رح أضل ألعلع فيهن لتصير تفهم.
- يا زلمة! كل مرة انت وهالحكي تبعك اللي ما بيجيب همه؛ المخيم عم يحترق وإنت قاعد تحكيلي كلام فاضي.
- المخيم عم يحترق عشان الكلام المهم بيصير مش مهم حبيبي! لما الواحد يكون مش عارف هوي شو؟ وبيخلي أبو فلان وأبو علتان يحكي عنو، بيصير عادي يقبل يسموه أيا إشي.

- آه كل مرة اقعد كُلي راسي بهادا الحكي اللي ما بجيب همه.
- شو اللي ما بيجيب همه؟ شوف يا صاحبي: انت لما يصير اسمك عائد (بدل لاجئ) شوف شو بيطلعلك: رجعة على فلسطين، أرض ترجع عليها يعني. بشو بيفرقوا عنك العائدين تبع كوبا مثلاً؟ مش هيدوك الأميركان بيسموهن عائدي كوبا؟
_ آه؟ عائدي كوبا؟ شو هدول كمان؟
-لا والله يا صاحبي، بس اللي طلعوا من كوبا لما حكمها كاسترو وهربوا على أميركا، اميركا سمتهن عائدي كوبا، مش لاجئين كوبيين، عشان تجبر حكومة كاسترو على اعادتهن، وتضغط عليه فيهن فهمتها؟
-آه وشو صار معهن، رجعوا؟
- في منهن رجع، في منهن ضل، بس لليوم اسمهن عائدين كوبيين عشان حقهن يضل موجود.
-يعني هلق أنا شو بفهم منك؟
-تفهم مني؟ يا أخوي هيدول تبعون التنظيمات ما بدهن منك شي غير يسرقوك وينهبوك ويضحكوا عليك، وتبعون الجمعيات نفس الشي، هيدول بدهن ياك تضلك فقير عشان يقبضوا عليك، عشان يشحدوا عليك. يعني انت مش شايف كل مظاهرة بنعملها مين بيطلع ع التلفزيون؟ يا إما هن بيطلعوا يحكوا، يا إما هاي المرة عرفتها؟ ام سعيد.
- آه ههههههههه ام سعيد اللي بعمرها ما تحممت؟
-آه هي ام سعيد اللي ما بتتحمم، بتعرف ليش بيطلعوها؟ شي مرة فكرت؟
-مرة مسكينة يا زلمة بيطلعوها وبيدفعولها مصاري عشان انو تحكي
-وشو بتحكي؟ شو بتفرجي؟ بتفرجي أهل المخيم متخلفين وفقرا ونور وشراشيح صح؟
- انو ايه هيك شي
-لأ مش هيك شي! هيك هن بدهن يا أخوي، بدهن يانا شراشيح عشان يضلوا يقبضوا علينا من الأوروبي، والأوروبي أحقر منهم بمليون مرة، أصلا هن متفقين مع بعض.
- يا زلمة إيه هضول الشقر اللي بيجوا ما بيعملوا شي بالمخيم إلا بيضلوا يصوروا. يا زلمة مش عارف إيش بيصوروا.
- بيصورونا، ليش بتفكر شو بيجوا يعملوا غير يعملوا علينا دراسات كأنه حيوانات بالحديقة احنا، انشالله بتفكرهن هيدول بيحبونا؟ هيدول بيشوفونا إما مغامرة يتسلوها أو دراسة يعملوها أو معلومات لشي جهاز أمني. تذكرتها هاي اللي كانت تشتغل مع النروجية اللي طلعت عميلة للموساد، يا زلمة حطوا عنها على الجزيرة تذكرتها؟
- آه يا زلمة، طيب وليش الفصائل والتنظيمات ما بتحمينا؟
-الفصائل ومين؟ هههههه. حبيبي هيدول ما فاضيين. فاضيين بس يسرقوا من بعض او يطخوا على بعض! بالله عليك قللي إيمتى آخر فصيل عمل عملية بفلسطين؟
- حماس عملت وبتعمل والجهاد كمان.
- آه حماس والجهاد بيعملوا. بس مش تبعون مخيماتنا. اللي بيعملوا، تبعون غزة والضفة، مش تبعون هون.
- وليش شو الفرق، ما هن ذاتهن.
- لأ حبيبي مش هن ذاتهن أبداً. اللي عنا بحياتهن مش طاخين على حدا، مش ضاربين حجر عشان فلسطين، اللي عنا هدول متلهن متل الحرامية التانيين، بيوخدوا صور وبيساعدوا الخليجي هاي المرة.
- آه والله معك حق بشوفهن بيجيبوا تبرعات من الامارات هاي الجمعية اللي بتوزع خبز كل يوم. هيدول كتير مناح بتعرف...
- مناح؟ بشو مناح؟ عشان بيوزعوا خبز؟ انت شفته للخبز شي؟ شي مرة مسكته؟
- لا والله امي ما بتجيب منه.
- عشان هيك! لو بتشوفه يا زلمة خبز اذا ما بتوكله بنفس النهار بيصير زي قطعة الحجر! هادا حبيبي هو الخبز اللي بيضل بالفرن وما بيبيعوه
- ايش هالحكي يا زلمة يعني عم يوزعوا علينا زبالة الخبز؟
- آه زبالة الخبز، حبيبي أصلاً أقولك إشي: التنظيمات الاسلامية الفلسطينية بلبنان أكذب بمليون مرة من التنظيمات الباقية بتعرف ليش؟ عشانها بتقنعك انها مقاومة ومسلحة وبدها فلسطين، وهي ان كترت بدها نفس اللي بدهن ياه الباقيين! يازلمة قيمك منهن
- آه والله، صار بدها سحلب من عند أبو حلب، خدنا بالله
- معك حق والله، بس من الآخر: اسمي عائد فهمت؟ ولا بعدلك ياها؟