يا أخي وبعدين معكو؟ بعدين معكم؟ يا أخي فهمونا شو بدكم؟ حملناكم سنين طوال وهلق خلص. يا أخي عنجد ضيقتوا خلقنا. لا بتنفعوا بالقتال ولا بتنفعوا بالسكوت، طيب شو بنعمل معكم؟ آه، مش عم بحكي عن الصهاينة ولا عن المستوطنين. هيدوك بتعرف إنهم أعدائك، بتعرف بينك وبين حالك إنهم موجودين عشان يقتلوك. بس التنظيمات اللي ما إلها ولا فايدة شو بتعمل معها؟
يا عمي إلنا من 1982 واحنا بنسمع عن بطولاتكم ولا مرة شفناها، ولا مرة حسينا فيها، إلا على بعض، احملوا سلاحكو على بعض، يا الله شو بيتصيروا أبطال بيصير واحدكم أقوى واحد، وبيطخ وبيقوس وبيعمل كل الإشيا. حطكو ضد بعض، يا زلمة شو بتصيروا متوحشين. إيه وخلص. زهقنا منكو ومن قرفكو، زهقنا عنجد، خلص. يا أخي اعرفوا وافهموا علينا: خلص عمركو الإفتراضي، خلصتوا خلص. خربتوا، عفنتوا.
شو بدكو بعد نقولكو؟ مبارح استشهد شاب صغير من شعفاط، بتعرفوها لشعفاط؟ ولا ما سامعين باسمها كمان؟ شو عملتوا يا حلوين؟ كلكوا شو عملتوا؟ من أكبر فصيل لأصغر فصيل؟ ولا إشي. مبلى مبلى عملتوا: العمى إحنا شو ما بنقدّر اللي بتعملوه: نزلتوا بيانات. استنكرتوا ونددتوا ورفضتوا. آه والله كلكوا نزلتوا بياناتكو، كلكوا بعتوا كلام مكتوب على وسائل الإعلام إنه إنتو ضد ومش عارف شو، وكلام كبير من نوع: جماهير شعبنا، والنضال والكفاح والصراع ومش عارف شو، وكل مسؤول من عندكم، الله يحميه هو وولاده ويحفظهم (إنشالله بشي علبة سردين كلهم مع بعض) قاعد تحت المكيّف بالوقت اللي شباب شعفاط والقدس والضفة مولعين الشارع. حدا من هالمسائيل نزل؟ حدا من هالقيادات الخشب نزل؟ حدا من هالعالم اللي معتبرة حالها فوق الناس جرب يشوف الشارع شو بده؟ شو محتاج؟ كيف فينا نساعد؟ أو نوقف حد أهل الشهيد؟
لأ، ما هن مش فاضيين، هلق في مؤتمر للسلام عامليته جريدة يديعوت، بدهم يشاركوا فيه، ما فاضيين، معقول يكونوا فاضيين؟ تبعون السلطة خالصين، خالصين بالمرة. يعني المسؤول عندهم همّه كيف يرضي الصهاينة ويطلع هالمصاري ويهرب فيهن لبرا، لا فارقة معه فلسطين ولا الشعب الفلسطيني ولا حدا. الهم الوحيد عند واحدهم بيكون: «كيف بنقدر نلم شوية أموال ونحطهن على جنب بركي بكرا طردوني لما يكشفوا شو عم بعمل وشو «لهطت». يا زلمة واحد متل عريقات كيف بعده بالسلطة؟ بس إذا كان رب البيت بالطبل ضاربٌ فشيمة أهل البيت الرقص والطبل! أصلاً أبومازن كيف بعده؟ بعد ما قال هيدول المختطفين الصهاينة «بشر» كيف ضل رئيس سلطة؟ كيف ضل؟ ما حدا بيعرف، ولا حدا هيعرف. بس مين قال مطول؟ ما حدا مطول، ولو دامت لغيرك ما وصلتلك.
آه وعشان ما حدا يفكر إني عم بحكي عن فتح والسلطة بس. يا حبيبي لأ عم بحكي عنك انت كمان تبع امارة غزّة: عيوني إنت مش أحسن من تبعون السلطة. حبيبي الجرايد الإسرائيلية اليوم فرجت «العورة» تبعيتك. حبيبي! اليوم أعلنت الجرايد العبرية كلها إنه انت مضيت اتفاقية «عدم اعتداء» مع الصهاينة. فانت كيف بتكون أحسن من السلطة؟ انت كل الوقت وانت قارفنا إنه انت مع النضال، انت مع الثورة، انت مع الكفاح، انت مع الجهاد، وانت وانت وانت، وإنه الخاين أبوعمار وخونة أوسلو واتفاقية العار، واتفاقية الذل. ومش عارف شو من هالكلام اللي بلا طعمة. وهلق يا معلم انت وين؟ انت يا أخوي متلهن وعلى أسوأ. بعدين أحلى شي؟ بتعرف شو أحلى شي؟؟ الحمقة اللي طلع فيها هادا متحدثكو الإعلامي: أبو زهري ولا مش عارف شو اسمه: قال شو: بدنا نحرق الأرض تحت الصهاينة، بدنا نولعها. وبعد يومين طلع بيان تاني ومؤتمر صحفي لحدا غيره كمان من نفس «القعدة» وبعدين بيطلع إنه في اتفاقية مع الصهاينة. العمى العمى العمى! ما عأساس بدنا نحرقها وبدنا نولعها ومش عارف شو؟ الظاهر ما في توليع؟ لكان شو كنتوا عم تعملوا؟ عم تضحكوا علينا؟؟؟ بعدين بحياة الله لما كنتوا تبعتوا شباب على سوريا يحاربوا ويموتوا، مش كان أسهل تخلوهن عشان يحاربوا بدل الاتفاقيات؟ آه وصح: وينهن الرجال تبعون القدس اللي علقتوا صورهم هائلة الحجم بغزة؟ (اردوغان وحمد وتميم)؟؟ وينهم؟ مش هلق وقت يقفوا مع غزة والشعب الفلسطيني؟ وينهم مش عم نسمع أصواتهم؟ ولا مش زابطة هلق؟ إنتو أكذب من السلطة، وأسوأ بمرات، بتعرفوا ليش عشان هدوك كل شي عندهم عالمكشوف. إنتو بتلعبوا عالسكت! العمى!
يا حلوين: احنا مش بس زهقنا منكم، احنا تعبنا كمان، كل مرة بتيجي وبتعملوا قعدات ومؤتمرات ومش عارف شو، وبتحكوا باسمنا، مين قالكو إنه احنا بدنا ياكوا تحكوا باسمنا؟ مين قالكوا؟ مين قالكوا إنه احنا راضيين عن هادا الشي؟ مين قالكوا إنه انتو بتشبهونا؟ انتوا بتشبهوا بس حالكم وولادكم يا حرامية فلسطين، يا آكلين مال الشهداء!