كابي سرور- بس المظاهرة كرمال المجزرة الوحشية يلي ارتكبا العدو الصهيوني ب «غزة»!
- ليش في مجزرة إنسانية ومجزرة رحيمة؟ وبعدين شو يعني عدو غاشم يا كميل يا موراني؟
- والله ما بعرف، هيك بسمع من شي 30 سنة بالإذاعات والتلفزيونات والجرايد إنو عدو غاشم
- وإنت ما نازل يا «كميل» وتعيّط وتسبّ ها العدو الغاشم يلّي ما بتعرف ليش غاشم؟
- بعدني حافظ كم «هتاف» من إيام «بيّي نوح» طلعو ظابطين عا ها الإيام يا أبو شادي
- من كم سنة ها الحكي يا «كميل»؟
- من سنة 48 يوم النكبة والنكسة والهزيمة
- وشو كنت تصرخ بالمظاهرات يا «كميل» يا ابن «كرم سدّة» الماروني وحارة زغرتا؟
- كنت شيوعي وعرّ عا كتاف الشباب ونحنا طالعين بعد صلاة الجمعة من الجامع الكبير بطرابلس وحاملين صور الكافر «غيفارا» والكافر يلي بفزّع، الصيني «ماوتسي تونغ» وأبو اللحية الألماني «كارل ماركس»
- وشو كنت تعرّ؟
- «يا خويا بالجزائر... خلّي رصاصك هادر»
- وشو كمان؟
- «يا خويا بالأردن... خلّي الرصاص يرنّ»
- وكمان... وكمان يا «كميل» يا عيوني
- «يا خويا بالرباط... إضربهنّ بالصبّاط»
- ليش ما كان معك بارودة يا «كميل» يا موراني؟
- كان معي حجران ودواليب
- وعلى مين تشلح الحجران؟
- على سراية الحكومة اللبنانية وعا درك تاع ها الحكومة
- والدواليب وين تحرأُن؟
- عا أوتوستراد طرابلس بيروت ونسكّرو بركي طلّ راس العدو الغاشم من هونيك
- يعني اليهود كانو رح يفوتو من «جونيه»؟
- ما هيك كان عم يحكي الأخ «أبو إياد» إنو طريق فلسطين بتمرّ من «جونيه»؟ بركي نسيت يا «أبو شادي»؟
- يعني إنت كنت مقتنع بها الحكي؟
- والله ما بعرف بس هيك كان بدّا القيادات تاع حزوبتنا
- وليش ما كنتو تعملو مظاهرات بمصر؟
- ولك «البكباشي» عبد الناصر قائد الأمة وزعيم العروبة واليوم سفارة إسرائيل جنب جامع الأزهر
- وضد السعودية؟
- عاصمة المؤمنين!.. ما عيب؟
- وأختك «قطر»؟
- أختي «قطر» مع حزب الله وعندا مكتب لإسرائيل وأحلى قاعدة لأختَك أميركا
- وسوريا؟
- قلعة المناضلين... عيب يا «أبو شادي»... وين النضال؟
- و«المغرب»؟
- سليل البيت الهاشمي وأمير المؤمنين بركي نسيت؟ شو بدَّك يا «أبو شادي» رح تزحّطنا ؟ يرحم إمَّك «أم جورج» وأبوك الكندرجي
- وليش يا «كميل» ما طالع عا الكتاف وعم يرأع صوتَك ضد العدوان الهمجي البربري السافل والمنحطّ متل جرس كنيسة مخايل تاع الموارنة بشارع الكنايس؟
- اليوم 28 كانون الأول 2008 وبلّشو الصهاينة عدوانُن اليوم... إذا عرّيت؟ رح يرجعو الـ 500 شهيد لأهلُن والـ2500 جريح وبترجع فلسطين؟
- وبدَّك ياني إمشي معكُن اليوم بالمظاهرة وعرّ يا «كميل» يا موراني بعد 35 سنة؟ ما صارت بايخة؟
... بس وحياتَك أنا بدي إدعس العلم
- الإسرائيلي يا «أبو شادي»؟
- ما بدعس علمو...
- لكن؟
- بدعس بارودتو وجزمتو
- بيشو؟
- ببارودتي إذا خلّوني إحملا
- لكن أي علم رح تدعس؟ الأميركاني؟
- كمان لأ... أنا بعلّم ولادي وولاد حارتي وولاد زواريب الألاعيط والجنازات والنواح والتياب السود وزهر الآس عا القبور، بعلّمُن بأحلى مدارس وجامعات إذا معي
- ما فهمت يا «أبو شادي»
- وإذا عن صح في حدا مع فلسطين ومع «غزة» يعني أنا لحمار يلي عمرو 35 سنة بفتح أحلى جامعات ومدارس وأحزاب ونقابات عن صح وأحلى جرايد وكلّو يسبّ بعضو وما يكونو كلاب للحكومة وباخد إجرتي آخر الشهر وعامل زلمة للمخابرات بالآخر؟
- شو بدَّك يا «أبو شادي» بالآخر؟ كل ها الحكي لأني عم إلَّك تمشي بالمظاهرة؟
- بدَّك ياني عن صح إمشي بالمظاهرة بس بدّي إدعس العلم
- يا «أبو شادي» إشبك شي؟
- بدّي إدعس العلم يلّي خلاّني جبان وكلب، وربط الجنزير عا لساني وكبّني بالحبوسة الوطنية لأنّي بدّي حرّر فلسطين
- ليش فتت عا الحبوسة تاع الإخوان؟
- كرمال فلسطين يا «كميل» واليوم الإخوان وبكل زمان ومكان عربي وبدون استثناء أو كرافات وعكال عم يبيعو الأضية ومتل إجرُن 200 مليون عربي ومليون شيوعي وإخونجي وقومي وبعثي تختخت عضامُن بالحبوسة تاعيتُن وحطّوُن عا عواميد المشانق والخوازيق والأسيد وعم يصرخو: أنا الربّ ولاه... يا جربانين يا عرب يا جرادين... بدكُن فلسطين ولاه..؟
وبدَّك ياني إمشي بالمظاهرة يا «كميل»؟ استحي شوي عا شيبتي وعا أرعتي يا خال كرمال الله
- بس لهلأّ ما عرفت علم مين بدَّك
«يلّي بيصلّي الأحد
ويلّي بيصلّي الجمعة
وآعد يفلح فينا على طول الجمعة...»

■ ■ ■

- وشو رح تعمل يا إبني؟ رح تضلّ بها التعتير؟
- لأ يا بيّي بكرا الصبح طالع أنا ومرتي وولادي عا جبّانة الروم ونشكّلّك التربة بكومة زهور بس خلّيك عم تترضّى عليّي...

■ ■ ■

«يا بني السّما تضحكلَك وتحميك
ودراج فوق دراج تبنيها
ويوم الرّجوع بلادَك تناديك...»

■ ■ ■

«ويلي دلعونا ويلي دلعونا
باي باي الغربة الوطن حنونا...»