كابـي سـرور
ــــــ إذا كل يوم بتفيق عا منبّه الـ Cellular، الساعة 7,35 تا تروح عاشغلك متل التيس، مين بتسبّ يا بوشادي؟
ــــــ بسبّ أميركا واليابان!
ــــــ وإذا نفس التليفون ما عاد يرنّ، من تليفون حبيبتك شو بتعمل؟
ــــــ يا بغيِّرو، يا بيغيِّر حبيبتي لأنّا بالأصل غيّرتني.
ــــــ وإذا خانتك مرتك يلّي مع 14 الشهر، مع واحد من 8 الشهر شو بتعمل؟
ــــــ بطلّئها.
ــــــ لأنّـا خانتك؟
ــــــ لأنّـا خانتنـي مع واحد تبع 8 Mars
ــــــ وإذا كنت شيوعي، وبعدين عملت زلمة عند شي نائب، شو بتكون؟
ــــــ بدّي عيش ودبِّـر حالي!
ــــــ وإذا سرقت مال الدولة، يلّي هوّي مال الفقير، شو بيعملولَك؟
ــــــ مَشي! شاطِر وفلهَوي وإيدو طايلة وصحتين عا قلبو!
ــــــ وإذا مشيت مع المخابرات السورية 30 سنة، وعملت وزير أو نائب أو رئيس بلدية أو مختار أو عميد جامعة، شو بتكون؟
ــــــ بكون مجبور ومضغوط عليّي وهلَّق تبنـا! وعفا الله عمّـا مضى!
ــــــ على افتراض يا بو شادي أنو صار اتفاق بين الحكم الفارسي العجمي الشيعي وخادم الحرمين الشريفين السنّي العربي، شو بيصير؟
ــــــ بيصير حسن نصر الله بطل قومي. وبيطلع الحقّ عا الطابور الخامس الحقير، يلّي فرَّق بين الأهل والأخوة!
ــــــ إجا دوري بالأسئلة يا دباح...
تخيّل أنو الرفيقة غوندوليسا طلعت عَ تلفزيونات العالم وقالت أنو الحكم السوري اغتال رفيق الحريري وفات الجيش الأميركاني عا الشام، شو رح يصير؟
ــــــ بيجي عبد الحليم خدام وما بيعود في 14 و8 آذار.
ــــــ وإذا الرفيقة ذاتا طلبت من إسرائيل تنسحب من شبعا؟
ــــــ ببطل يا بو شادي ألو طعمة سلاح حزب الله الشيعي!
ــــــ وسلاح المخيمات السني يا دباح؟
ــــــ بس هيدا يفلّ هيداك رح يفلّ. وَلَـــوّ!
ــــــ طيب يا دباح، سيرة وانفتحت، ليش الأقمار الاصطناعية الأميركية ما كشفت 14 جريمة اغتيال
وتفجير وتـهريب ؟
ــــــ بيجوز يا بو شادي تكون البطارية فضيت، ونامت الأقمار على ضو القمر وعلى صوت فيروز:
«نحنا والقمر جيران»
ــــــ سنة 1969 صرخ رئيس الجبهة الشعبية جورج حبش بدو الحقيقة للجماهير، وبـ14 آذار 2005، وَلوَلت الجماهير اللبنانية كمان بدا الحقيقة.
ــــــ الحقيقة يا رفيق أبو شادي. إلي 18 سنة عم أطلب الحقيقة من مرتي: كم مرّة خنتيني يا مرا بشرفك؟
ردّت مرتي: يا دباح، إنتَ بتعرف انك ما بتجيب ولاد، وصار عندك 7 ولاد، وعم تسألني كم مرة خنتك؟
بدّك الحقيقة ولاه! ولك روح ملّس قرونَك!...
ماتت الرفيقة وعمرا 75 سنة. تم دفنا في جبانة الباشورة بجوّ عائلي حميم.
ــــــ الفاتحــة...