(واحد بمكتب محاماة أو عيادة أو بمحلّ للألبسة شاف موظّفة عجبتو، وبدّو يتحركش فيها ومش عارف كيف، فجأةً بيسألها)هو: دموازيل، بيعجبك المطرب راغب علامة؟
هي (بعد صمت صغير وابتسامة): بيعجبني إي، لي في شي؟ (بتهذيب ووضع حدّ).
هو: لا أبداً بس لأنّو أنا مثلاً ما بيعجبني و... و... هيك حبّيت أعرف رأيك.
هي: ماشي (تمتمة) ولا يهمّك (صمت).
هو: عفواً بس بتعتقدي إنّو ممكن عالعِشْرَة ممكن تحبّبيني فيه برأيك؟
هي: عفواً ما فهمت كيف (قاطعها).
هو: أنا بيتهيّألي معقول كتير صير إعْبَدو إذا صرنا نشوف بعض أكتر...
■ ■ ■

(تحقيق في مخفر ثكنة الحلو مع والد الموقوف)
الوالد: ما كلّن لابسين نفس الـ T-Shirt تبع غيفارا، ليه خبصتو السيارة لإلو هوّي، ليش إبني شو عمل شي غلط؟
المحقّق: لأنّو إبنك مش حابب الـ T-Shirt، حابِبْلي غيفارا!!! منين لوين ما «بيتعاطى» سياسة؟ حشيش وكذا مذا... يلله ضهّرو الوالد لبرّا.
■ ■ ■