مايا قسّيس شلّيطا
حلو يخلص عهد الجيم، عهد كلّو إجرام... عهد حرم شبابنا وجرّدن من العلم والثقافة والحضارة... عهد الخطف والحواجز والتصفيات... عهد الجهل وقلة العقل... عهد الجبل والناس الهربانة ونصّا مذبوح فوق... عهد الدم السايل من حارات القرميد بأنهر لبنان النقية... لبنان التعبان من كتر ما بتلفظو اسمو عالفاضي...
حلو يخلص عهد الصخرة اللي ولا مرّة عطاكن يّاها «مار بطرس» ولا سلّمكن المفتاح... إنتو احتلّيتو الصخرة وسرقتو المفتاح وحفرتو إسمكن عليا...
حلو يخلص عهد العناتر وتهديداتن وسلاحن اللي قعّد ملايين الشعب العادي عالدراج وبالملاجئ سنين، وعهد تهريب الشباب اللي ما إلو ذنب إلا إنّو بدّو يعيش بسلام...
اشتاقت الأدمغة ترجع وتعمر لبنان، واشتاق لبنان تهجرو روس الشر والأيادي السود وتجار البشر والمال السياسي...
حلو يخلص لبنان الحلوب، لبنان الجذاب المحبوب، اللي بعتوه مليون مرة، وقبضتو حقو وما شبعتو وما رح تشبعو إلا تتنفّذو فيه بنود الطائف الخفية وتعلقولو عاباب مطار بيروت الأبية آرمة بأحرف ذهبية: «جزيرة السعودية السياحية»...
حلو يخلص عهد الزعما الآلهة... اللي عملو من الذبح والقتل حلال... حلالن باسم شو؟! باسم الدين... باسم الطايفة باسم الوطن... باسم العيلة... إيه والله حلال عليّن هالحلال باسم الشعب الساكت... باسم الأمهات اللي زهرت جمرة قلوبن زهرة بيلسان... حلّن يخلصو تنعيش بسلام من دون ما نسأل إنت شو وإنت مين...؟!
حلّن شبابنا يرجعو للتاريخ... يرجعو لفخر الدين، وما ينغشّو بشوية عناوين، ويبكو زعيم مصدقين إنّو انظلم عشر سنين...
قوم يا شعب يا مسكين... قوم شوف لبنانك نباع لمين؟! شوف ارضك. ارض القديسين، ارض ارتوت بدم المحرومين، ارض بترفض يربى ابنك قلقان وحزين، قوم تمرد وغير هالعهد اللعين... قوم كرمال دموع امك والانين، قوم كرمال مستقبل البنين.