Manifesto | إلى رفاقي وزملائي

  • 20

أقصد برفاقي وزملائي مَن هُم في «المبنى المذكور» دوماً وهذا ما يجب أن يكون، في «المبنى المذكور» وخارجه أيضاً.

(محكي) رايح جايي بهالمكتب وفي ورقة واقعة بين طاولتيْن. وعالرّايح والجايي اللّي هو إنتِ عم بتشوفها وعم تِنسَمّ، طيّب... ما شيلها. هلّق مش إنتِ موَقّعها. عال، بس ما حدا عم بيشيلها وصار إلها يومَيْن وهاي اليوم بيصيرو تلاتة، يعني برأيي شيلها وارتاح.

أوّلاً: لأنّو لو حدا بدّو يشيلها كان شالها.
ثانياً: هيدا بيأكّد إنو إذا سألت مين موَقّعها ما حدا رح يقول.
ثالثاً: أكيد ما حدا بهيك مكتب مسموم من الورقة قدّك.
رابعاً: يا خيّي مين ما كان موَقّعها الله لا يردّو، الله لا يقيمو، منيح هيك؟
خـامســاً: وقّفلي هالموسيقى يا خيّي...
خامساً: مش ضروري الواحد ما يلمّ ورقة إلاّ إذا هوّي موَقّعها، خاصّةً إذا سامّتو وما عم بيشيلها ورايح جايي.
سادساً: بهيك مكتب في إحتمال كبير ما حدا يلاحظ إنّو حدا شالها ولا حدا يعلّقلو وسام برتبة كوموندور مجهول أو مقبول.
سابعاً: بهالوقت اللّي عم نحكي فيه كنت شلتها. بعدان أنا عم بخبروني...
«ثامناً» إذا بدك، إنّو إنتِ مع التغيير ومع تطهير الإدارات ومع إعادة الهيكلة والبناء وحرّية الرأي وحرّية وسيادة وإستقلال وإشيا كتيرة وموعود بمساعدات دوليّة للبنان. هلّق أوكي ما دخّل، شيلك من هالإشيا بس بالأوّل... شيلها..... الورقة الورقة!

حزّورة غير خشبية



أول سؤال: Eldini 7262326
ثاني سؤال: Eldini R5XN
ثالث سؤال: 7262326-52746
والجواب: ← رمضان كريم.
أعزائي القرّاء، (محكي) هيك أصول تصير كلمة رمضان الفضيل، صار لازم نتوجَّه صوب العالمية، صار لازم نواكب العصر وخاصةً تكنولوجيا الإتصالات والعالم الإفتراضي. لازم الغرب الاستعماري، كخطوة أولى، يفهَم علينا ويفهَم لغّتنا أسرع، حتّالي لمّا نجي نشكّل لوبي عربي متشعِّب وضاغط، يفهَم هالاستعمار إنو نحنا هلّق عم نضغط! ما يفكّروا إنو عم نعمل فوضى متل العادة نتيجة تجمّعنا وإجماعنا الأعمى بلا سبب عا كلّ شي، خود مثلاً القضية الفلسطينية، قليلة قدّي صرلها؟ قديمة صارت، صارت بايخة وممجوجة عالتكرار، والأخطر شي، صارت خشبية!!! أو إنو مثلاً خود قصة الرسوم المسيئة للنبي... ما معقول ردّات الفعل... خشبية كلها.
يا جماعة مش دايماً بيكون العدو الصهيوني ورا هالحوادث، وين رايحين بالفكر المادّي والإلحاد هيدا الشيوعي. هيدا هوّي الخشبية بعيْنها، مالنا ومالها يا عمّي! طيب ما الغرب هيّاه كَوْنو حرّ، كتير أوقات بيتمَصْخَر عا سيّدنا المسيح. ما القِيَم عندو مِن بعد الثورة الفرنسية واضحة صارت: ديموقراطية وبينتُج عنها عدالة وحرّية. ونحنا قاعدين بالمقابل بلغّة ما عم تتطوَّر فبالتالي عم نضيِّع وقت الشعوب الغربية أوّل شي، بلغّة صعبة عليهن... وبعدين خشبية، يا عيني عا هاللغّة! بينما الغرب عم يعمل جهدو ليقرا ويتداول فيها، يعني وضعنا المفروض أفضل مِن 15 سنة لَوَرا، عالأكيد. الأنغلوساكسون بيقروا رمضان كريم: Ramadan Kareem. والغاليون بيقروها: Ramadan Karim. وتصوَّر إنو هنّي على هبلهُن، ما الاستعمار غبي، بعدن ما وحّدوها بعد، والأغرب إنو بعد ما خطرلهن ولا رح يخطرلهن بكلّ بساطة وعلمية وعالمية: 7262326-52746 . هاي خشبة وحدة ما فيها... شو بدّك، بدنا كتيييير بعد تنلحقهن.

20 تعليق

التعليقات

  • منذ 5 سنوات مجهول :
    ‫لاحظ معي
    ‫زياد .. لو إنّك بتقرأ هالتعليقات لتدرك بسرعة البديهة اللي عندك .. إنو حقا الشعب عم يبذل كل جهده ليفهم عليك ! زياد .. منحبّك ! (مع شدة كمان )
  • منذ 5 سنوات أبو الجواهر أبو الجواهر:
    ‫الله كريم..بس كريم مش الله
    ‫انو يا خيي..ان كانت kareem أو حتى karim..المشكلة عنا مش هون..المشكلة انو هالرمضان تبع هيدي السنة مش كريم أبداً.. دموي..DamaOI بروح هيك بلاقي دم..بروح هيك بلاقي أشلاء..وين بروح؟ هامش: زياد..خليك عم تكتب..ما تتركنا.. الحياة بدونك "شي فاشل"
  • منذ 5 سنوات Wassimov Wassimov:
    ‫مش المقصود اللغة، كلغة بحد
    ‫مش المقصود اللغة، كلغة بحد ذاتها بقدر ما المقصود شكل اللغة، المتداول يعني، أصبح خشبياً. متل ما إنو تبادل الحاجيات بين الناس تغير على مر السنين ومن فجر التاريخ لليوم، فمثلا: بدأ بتبادل الحاجيات - قمح مقابل البيض أو اللبن أو الملابس... - ثم أصبح التبادل بالذهب و الفضة ثم أخذ يتحول تدريجياً إلى ما نعرفه اليوم بالأوراق المالية والرصيد المالي المرقّم.... هكذا لغتنا أصبحت خشبية فالمعجم اللغوي لدى الناس يضيق شيئاً فشيئاً ...من يدري ربماً يتحول إلى أرقام ورموز كما حاول ان يشرح زياد.... فالتعابير الشائعة أصبحت نمطية وضيقة وتعبر عن شيء واحد فقط (lol, brb, ...)... للمزيد من التنور راجع كتابات الكاتب جورج أورويل ونقده للغة المعاصرة وتنبؤه عن كيف ستتحول اللغة .... ربما لهذا السبب لا يفهم البعض على زياد... ليس لأن زياد لغته معقدة، بقدر ما أن معجمنا اللغوي ضيق ....
  • منذ 5 سنوات Sam Sam:
    ‫جميل اننا نعوز ان الغرب
    ‫جميل اننا نعوز ان الغرب يفهموا لغتنا بس لما نفهم احنا الأول نفسنا .. انا قريت الموضوع 3 مرات عشان افهم اللهجه !
  • منذ 5 سنوات فيصل باشا/برلين فيصل باشا/برلين:
    ‫جدلية الورقة
    ‫لنفترض جدلا ان الورقة هي عبارة ورقة مالية هل كانت بقيت لمدة ثلاث ايام طريحة الارض؟ فالنوعية هي التي تحدد أهميتها إذن او ماذا تحتوى او من وقعها ومن أوقعها ونوعيتها من شي تاني ماذا تحمل من أفكار او عملية حسابية مثل ١٤-١٤= - سيادة ،حرية ، استألال، او ٨ الاه بويصنص ديس ،يعني بناءً على انتماءها السياسي منفكر اذا منشيلها من الورطة ام لا،وممكن نوصلها بسيارة الوزير ونشوف خاطرها بكم ورقة،اعتقد انها تحمل بين طيات صفحاتها قصيدة حب وبما انو المبنى هو نفس المبنى وحفاظا من الاخريين على عدم التدخل والحشرية في خصوصيات الأخريين ما حدا لمها ،لكي لا تنتشر عدوى الحب للورق في المبنى ،شو منعمل يعني بكل هالكومبيوترات اذا صرنا من محبي الورق.لا بدها كاس عرق،لانوا صارت جدلية خشبية وتسبب الأرق ،يا خي لموا هالورقة وخلصونا بركي فيها الاستراتيجية الدفاعية.ومنبطل حوار ومنروع منشتغل شغلة بتنفع هالشعب الفقير.
  • منذ 5 سنوات مجهول :
    ‫يعني يا زياد ،الموضوع هو أكتر
    ‫يعني يا زياد ،الموضوع هو أكتر من ورقة! لو كل واحد شال ورقتو ،كان البلد بألف خير،وما حدا بغبر عالتاني،يسلملي فهمك.. بدك نحكي ونفش خلقنا .في حدا هلق راضي يمشي عالارض ،كلن طايرين وعندن "جيبات" من jeep يعني -الله يستر- يا عزيزي عنا كثافة حضارة ومهلبية وحمص بطحينة وغنوج،واللبناني كتير غنوج الله ما يصيبوا بالعين.. واسرع لبناني بيدفع 200 ألف دولار ليشتري أيفون 5,و شو بعد بدك أكثر من هيك حضارة ونظارة شمسية كمان، معقولة في حدا بيمشي على اجريه.خلينا من -المسلمات الهندسية والصورة والولاعة،بعدان بتجيك الأقساط المدرسية اذا عندك ولاد،واذا ما عندك بيكون ارتحت من الأزمة المدررسية وهالغلا ........
  • منذ 5 سنوات mostafa bakri mostafa bakri:
    ‫حليت اللغز
    ‫يا اخواتي....اذا معكم موبايل خشبي....يعني من القدام، مش بيري الاسود او أخ فون....و بتتغطوا كلمة ramadan karim ع ال لوحة المفاتيح....حرفا حرفا(كانكم عم تبعتو message ) رح يطابق معكن الرمز الرقمي المذكور اعلاه، و هيك بينحل سر الخرتيت، تبارك الاله، رع (ع اساس انا موجود بمصر)
  • منذ 5 سنوات مجهول :
    ‫بالنسبة لخامساً واردة مرتين
    ‫بالنسبة لخامساً واردة مرتين لأنو: أول مرة بيقول خامساً، بيصرخ وراها: وقفلي الموسيقى يا خيي. تاني مرة، بيرجع بيعيدها وبيكفي.. يعني يقول: "خامساً (يقاطع نفسه)، ثم يعيد: "خامساً: كذا كذا...". أما بالنسبة لثامناً (لعله سأل أحدكم)، فهي بين مزدوجين لأنها إقتراح منه على الرجل الذي يتكلّم معه، أي أنها نقطة ثامنة، وبنفس الوقت كلمة مستقلة ضمن سياق الحديث. شكراً
  • منذ 5 سنوات مجهول :
    ‫سخيف ...
    ‫سخيف ...
  • منذ 5 سنوات مجهول مجهول:
    ‫اللغة
    ‫انو بشرفك زياد عم تحكي انو بدك الغرب يفهموا علينا وع لغتنا ... انو بالاول نحنا عم نفهم هاللغة ؟؟؟ عم نفهم ع بعضنا بس نحكي مع بعض ، أو حتى انت فيك تعدلي كم شخص فهم عليك لي انت حكيتو هلأ ،، يا زلمي انت فهمت ع حالك هلأ شو حكيت ؟؟؟ كبر عقلك وكفي النومة بعد بكير للصبح ، طفي المنبه وكمل الحلم... لك منا موضوع ... عنجد خشبي ...
  • منذ 5 سنوات مجهول :
    ‫شدّة... لأنو في ملاحظة بأول
    ‫شدّة... لأنو في ملاحظة بأول النص بتقول إنو "محكي"، وبالمحكي شو بتقول؟ لغّة أو لغة... تنيناتن صح... يا فهلوي.
  • منذ 5 سنوات كفاح كفاح:
    ‫في 2 خامسا يمكن مقصودة
    ‫في 2 خامسا يمكن مقصودة
  • منذ 5 سنوات مجهول :
    ‫خشبية !!
    ‫يعني ب رأيك يا زميلنا زياد انو الرد على الرسوم رد خشبي يعني خشبي يعني بينحرأ او قصدك رد خلق محروء حريشو على راسي سيدنا المسيح والنبي , بس شوفت لو هل امور طالت الامام علي , اي كانو اهل بعلبك خطفو السفير الاميركي وعملوا أورما وبلا فدية هلا مرة ... ولف حصيرة وشنغل مرتك وروح فرشهن عل حشيش ..
  • منذ 5 سنوات مجهول :
    ‫السهل الممتنع
    ‫منهم من يقرأ المقال و يقول بان كل ما ورد فيه "علاك", لكن فعلا يا زياد بان كل من بقي ينادي بالمقاومة و يذكر بالقضية الفلسطينية اصبح برأي هؤلاء "خشبي" المنطق "Démodé". الله يلعن هذا الزمان الذي اصبح فيه "الممحون" مثالا يحتذى به!
  • منذ 5 سنوات حسن خريباني حسن خريباني:
    ‫وبتقلي ويكيليكس مش خشبية
    ‫231ا - 765س ، وبالعربي حطيطتلك الرموز تقلك انو العرب خلصو من الخشبية، وطلعو عالسفارة الامركانية، ورح يفتحو سفارة اسرائيلية... اي شو بدك احسن من هيك حرب على الخشبية ، ومحاربة اولاد البلد ... والسورية... مع الغربية
  • منذ 5 سنوات مجهول :
    ‫ليش في شدة ع لغّة؟؟؟ هي بأيّ
    ‫ليش في شدة ع لغّة؟؟؟ هي بأيّ لُغة؟؟؟