Manifesto | إنه سوري لماذا ينتظرني؟!! ــ 1

  • 50

كان يُفترض أن يكون مقال اليوم من قطعتين، لكنه تعدى عدد الكلمات المسموح بها. لذا سيتم نشر المقال الثاني التابع لهذا العنوان غداً الخميس.


■ ■ ■


ستالينين ـ Stalinine

ــ (محكي) خيّي أنا ما عم قلّك ماركس، عم قلّك لينين لينين، ما بتعرفو للينين؟
ــ أنا بعرف ستالينين مش لينين، أكبر ديكتاتور بالبشرية، لَكَنْ.
ــ صحيح كتير صحيح بس لينين غير واحد.
ــ إي هيدا مَنّي سامع فيه، أساساً بس تقول ستالين يعني: كلّ الباقيين مين هنّي؟ (بازدراء) ولا شي.

ــ مزبوط بس هيدا لينين، هيدا قبلو لستالينين (مقلّداً).
ــ ولا يمكن، ستالينين ما خلّا حدا لا قبلو ولا بعدو، وليك كلّن هيك هتلر، عمر البشير، القذافي، وبشار الأسد بعزاهم، هول كلّن عا نفس السكّة، بيتمتّلوا بستالينين.
ــ يعني... إذا بدّك... بس هتلر بما أنّك ذكرتو تمتّل فيه صاحبك بوش. ذاكر أدّيه رسموه الأميركان. قبل، الأوروبيي شو كانوا يرسموه؟ هتلر ولّا ستالينين؟
ــ إن كان هتلر ولّا ستالينين أخرا من بعضن.
ــ ما هيدا اللي عم جرّب قولو بس لينين من غير طينة.
ــ شو بيعمل هيدا؟ مع مين هوّي؟
ــ لينين إذا (قاطعه)
ــ بيكفّيني إنو ستالينين مع حافظ الأسد.
ــ بشار قصدك.
ــ وبشار طبعاً، هول مدعومين مباشرة من ستالينين.
ــ بس ستالينين مات.
ــ ستالينين ما مات، أيمتى مات؟
ــ سنة الـ ١٩٥٣.
ــ إي بيكون إبنه اللي داعم بيت الأسد.
ــ إي لَه، إبنه لستالين شو بدّك هلّق، بعدين ما حدا بيعرف عنّو شي.
ــ ما عندك ماركس، شو بيشكي ماركس؟
ــ ما بيشكي أبداً الباقيين بيشكوا منّو.
ــ طبعاً لأنو كان طاغية وقت اللي حَكَم، هيئتك ما بتعرفو لماركس.
ــ ماركس خيّي ما حَكَم.. ما حَكَم بالمرّة، إذا حَكَم حَكَم عالرأسمالية وإنو الرأسمالية (قاطعه)
ــ أعوذ بالله، ماركس حَكَم عالشيوعية، «يا عمّال العالم إتحدّوا»، وَلَو؟
ــ إيه «إتحدّوا» ضدّ مين؟
ــ إتحدّوا ضدّ الشبّيحة وشوكت مخلوف وضدّ العلوية كلّن لتوصل لبثينة شعبان.
ــ ضعت أنا هلّق، عن مين عم تحكي؟
ــ عن الجيش السوري الحرّ وعندك المجلس الوطني! هول اللي رح ينتصروا.
ــ والعرعور شو؟ هيئتك مش راضي عن العرعور.
ــ العرعور؟؟ يا عين!! ما هيدا مخلق منطق مفصّلتو المخابرات.
ــ كل شي مخابرات هلّق؟
ــ بسوريا أنتَ يا حبيبي، كل شي، كلّهن.
ــ يعني برهان غليون كمان (تأكيد).
ــ فشر! إنت عارف كم سنة حبسوه للغليون؟
ــ ما على علمي الغليون انحبس.
ــ كيف ما انحبس؟ حبسوه بباريس، بهيدي القلعة.
ــ هنّي حبسوه من سوريا بباريس؟!
ــ طبعاً، لأنو هرب هوّي أوّل مرّة وقدر وصّل عباريس، رجعوا حبسوه.
ــ إي وبرأيك بينعمل ثورة من باريس؟ إنو فكرك هتلر بيرضى؟
ــ أيّا هتلر؟
ــ في هتلر واحد، هيدا اللي بتكرهو انت.
ــ ولك خلّصني (وَوَقَفَ) خرا عا هتلر ليلحق بوش.
ــ أيووووووووا هيك لينين بيقول.
ــ ستالينين قصدك؟ (ويرفع بنطاله).
ــ ستالينين من كلّ بدّ، لأنه لينين حطّو عا حكي.
ــ ما عم قلّك من الأول، ما حدا سامع فيه.
ــ يعني مش هلقد، جورج صبرا مش سامع إلا فيه.
ــ ومين بيكون جورج صبرا بللا؟
ــ شو بيعرّفني ما انتو اللي طالعين فيه.
ــ بيكون العرعور اللي طالع فيه، يعني شو؟ يعني مخابرات، ما كلّ المسيحيّي مخابرات.
ــ والبطرك هزيم مخابرات؟
ــ هزيم وعودة ونصر الله صفير وشو إسمه هيدا... جورج خضر.
ــ إنت يمكن قصدك بشارة الراعي.
ــ إنتَ قصدك بشارة الراعي (ومشى متمتماً وحده)... لينين؟ أروح لينين آه!

50 تعليق

التعليقات

  • منذ 5 سنوات ثــائــر ثــائــر:
    ‫زيــاد مــا غَــيَّــر
    ‫راح احكي كلمتين لكلّ اللّي عم يتفلسفوا على زياد الرّحباني: يا جماعة انتو غيَّرتوا سياساتكن أمّا زيــاد مــا غَــيَّــر إنتماؤه الحقيقي. وإنطلاقاً من مُعادلة زياد الأخيرة: إنتوا الظّاهر بتلعبوا سياسة منيح! ويلّا كشّوا برّا. الله يحميك يا زياد...
  • منذ 5 سنوات سليم عساف سليم عساف:
    ‫تحية من القلب
    ‫الفنان الكبير زياد الرحباني: أتوجه إليك بتحية من القلب، كموسيقي عبقري متقدم على معاصريه، وما زال يدهشني كلما أعدت الاستماع لأعماله، وماركسي عبر عن فكره وانحيازه الطبقي من خلال الموسيقى والأغنية والمسرح والصحافة، وإنسان يتميز بصدق نادر ويصر على تمزيق الأقنعة الاجتماعية بسخريته اللاذعة. أتفهم جيدا موقفك من المعارضة السورية الخارجية وارتباطاتها الإقليمية ، كما لا يخفى على عاقل أن الساحة السورية أضحت ملعبا للقوى الإقليمية والدولية المتصارعة على سورية أو من خلالها، ولكن الحدث الأساسي في سورية الذي استتبع كل هذه المتغيرات كان انتفاضة شعبية لها أسبابها الموضوعية، وعبرت قبل كل شيء عن واقع الظلم الاجتماعي والتهميش الذي طال فئات واسعة من المجتمع السوري. الوضع السوري الراهن وضع مركّب، فهناك حراك شعبي ثوري غير مسبوق، وهناك صراع طائفي، وحرب أهلية، وحرب إقليمية ودولية بالوكالة، وهناك وضع إنساني مأساوي، هناك نازحون وشهداء ومعاقون ومعتقلون. النظام السوري الحالي جزء أساسي من الأزمة السورية، واستمراره يعني بأحسن الأحوال انفجارا مؤجلا. القوى الإقليمية والدولية المتصارعة على سورية من إمبريالية ومقاومة تقوم جميعها بدور قذر على حساب الإنسان السوري. أعتذر عن الإطالة، ولكنني شعرت بالمرارة العميقة للطريقة التي تناولت فيها المسألة السورية من اختزال وتسخيف لا يتناسبان وتناولك العميق للحرب اللبنانية. النموذج الذي اخترته في مقالك يحمل الكثير من الإهانة للشعب السوري الذي قدّم الكثير ويستحق واقعا أفضل، أو على الأقل لا يستحق التحقير من إنسان نحترمه ونقدره كثيرا.
  • منذ 5 سنوات dr_al_bawy dr_al_bawy:
    ‫الآن الآن فهمت الرحبانية
    ‫حظي السيء أوصلني الى مقالك في الثالثة صباحآ وزوجتي نائمة والأولاد نائمون والجيران والشارع وأين؟ في أحدى مناطق مدينة يتبوري السويدية التي في الأصل لا تسمع فيها ضجيج في النهار فكيف ليلا؟وأنا قليل الضحك ولا أعرف أن مقالك هذا سوف يجلب الويلات على كل من حولي ..أقسم أنكم أدخلتم السرور الى قلبي الليلة ولو أقرأ كل يوم مقال سوف أترك أدوية القلب والضغط والكلسترول,,فشكرآلك زياد وشكرآ للأخبار وشكرآ للبطن التي حملتك. الدكتور علي الباوي ..السويد
  • منذ 5 سنوات مجهول مجهول:
    ‫ولا ما في باللبرغل ولا فيه
    ‫ولا ما في باللبرغل ولا فيه مخابرات و الفاصوليا ... بتعرفا للفاصوليا والله المخابرات ما مخليا ولا فص وليا ولا
  • منذ 5 سنوات مجهول :
    ‫ماحد فيه علق عا زياد اذا
    ‫ماحد فيه علق عا زياد اذا مابتفهم لغتو مافي داعي تحكي وماحد بيمثل الشعب السوري مو كل ما ماطلع معارض من باريس انا بمثل الشعب السوري وتحية من جديد لزياد الرحباني
  • منذ 5 سنوات مجهول مجهول:
    ‫كلامك مستهلك..
    ‫برغم حبي لتاريخ زياد واحترامي لتضحياته الكبيرة المعروفة، بس اسلوبه بالكتابة صار كتير مستهلك، في حجم استعراض ومحاولة تخفيف دم كتيرة بنصوصه، صرت حسها مجردة مزاودة..برغم اني كنت حسها عفوية منه بفترات سابقة ...
  • منذ 5 سنوات مجهول :
    ‫تسمع مني زياد
    ‫لا تكتب بالاخبار .. بلالك ياها .. والميادين كمان بلا ما تطلع عليها .. بس بكرا لانو ناطرينك وحط مليون خط تحت كلمة ناطرينك انما بعدين لا عاد تطلع عليها ولا تكتب بالاخبار .. فيك تعمل شي صفحة على النت وما تخلي حدا يعلق عليها ..مش كبر منك حاشا لله وبعرف انك مش هيك .. انما بعرف انو انت عم تكتب مش لاي نوع من المعلقين .. انت عم تكتب لالك .. واللي عم يقرالك هوو الله
  • منذ 5 سنوات علي ديوب علي ديوب:
    ‫الى زياد الرحباني.. دعوة إلى سوق المنهوبات من بيوت اللي بدن حرية
    ‫الى زياد الرحباني.. دعوة إلى سوق المنهوبات من بيوت اللي بدن حرية: غشاوة يورثها شعور التصطيل الطويل... بعد عمر تمنينا ان يكون حافلاً بما توقعناها عبقرية تعد بعطاءات لا يحد منها سوى الافتقار للمال. و قلنا سيأتي من يسد هذه الثغرة، أو تفرض العبقرية قيمتها في الأنام. ماذا دهاه!!؟؟؟ قد يكون القنوط؛ لا اليأس- قال زياد: لا تيأسوا، ما في أمل. قد يكون الجبن، و الحاجة و الذلّ... قد..؛ إنما ليس من خُلُق الناس، ليس.. و ليس.. تعفيس رأس المظاليم، وترك القلوب الصغيرة تفتتها طائرات التمسك بالعرش.. و عن أمهات يجرجرن قلوباً مشظاة، خلف صغار ذرّرتهم هباءً نسور البواسل في عدم حلّ في البيت ضيفاً- عدوّاً... إذا ما اعترضتَ عليه اتُّهِمتَ بأنك تنوي اغتياله. واتهِمتَ بأنك تنوي إبادة تلك الأقليات!! أنسيت زياد، حديثك عن جيش الاسد في مرتفعات لبنان؟؟؟ أم تهابلت عن بلاد تحبك، حيث تراها بلاد الوحوش الكواسر طوبى!!؟ ما عاد ثمة من قيمة للإشارة والرمز: بات العدو معين الجنود على شعبهم- جهرة. يا ويلتي: لِمْ أكلم من يتغنى بعنف العساكر، من رعيل الستالين..؟؟؟ يا خيبتي، صار من عاديات الحوادث أن يتغنى زياد بالأبديَّين- الغضنفرُ، وحش الوحوش المخلَّد في غَوْط أدمغة خائرة، والشبلُ نسل الدلال. ليت زياد يفتّش في أسواق السُّنّة عمّا يصلح لحنا يسهل تمحيلُه..؟ ستفاجئه لابد السيديات الرحبانية أكواماً بين الأقدام- وزياد منها- تحت الشمس الهازئة بذكرى أغنية فارقها عاشق!! سيبدع زياد- بلا شك- أغنية عن دماء النغم.. وتأسره كلمات تتعرض للاغتصاب الجماعي( دوث القريب) وقت الظهيرة، كي يتمتع مغتصبوها بلون البكاء الصريح. علي ديوب
  • منذ 5 سنوات مجهول :
    ‫عسكر سوريا !!
    ‫شكلك يا زياد نسيت عسكر سوريا!!! عم تفقود الذاكرة كتير هل اليومين...وصاير عم تخربط بين اليمين واليسار
  • منذ 5 سنوات مجهول :
    ‫مش بريئة
    ‫"بيكون العرعور اللي طالع فيه" طالع فيه و طالع فيها, مش بريئة خالص :)
  • منذ 5 سنوات نور نور:
    ‫رد .... مانيفستو زياد .
    ‫بما ان زياد بالأصل موسيقار ما بيقدَر الا ما يقسّم عالوتر ... أيّ وتر . المشكلة أن -بالواقع الواقعي - هيدا غير الواقع اللي بمخ كل واحد\ة عايش\ة على وج هالبسيطة.... الأوتار كلها متداخلة ومتشعبة ومعركسة ببعضها البعض بشكل أنو كل ما حدا دق على وتر ما من دون ما يقصد- حتى لو كان بهلوان مش بس عبقري موسيقى .... حيهّز كذا وتر على وتر وهكذا دواليك ..... والفهيم( اللي بيفهم كيف عقل زياد مركّب بالأصل ) هو اللي بيقدر يحزر على أي وتر عم يقسّم هلق زياد ...
  • منذ 5 سنوات haydi ana haydi ana:
    ‫يا جماعة الخير
    ‫(محكي) يا جماعة يا جماعة طولوا بالكن شوي.. ليش ما بتشوفوا هالمقال عإنو للضحك والمزح وإنو فشة خلق ويتمرّقوا متل ما بتمرقوا اخطاء مسؤولينكم للي حارمينكم من أبسط وسايل العيش حتى صرنا نقول عايشين من قلة الموت..
  • منذ 5 سنوات مجهول :
    ‫كان لازم ينكتب قبل العنوان
    ‫كان لازم ينكتب قبل العنوان هذا المقال للناس اللي بتفكر ابعد من انفها,"جنة الناس قليلة الفهم منازلها" انا الي الفخر اني عشت بزمن زياد الرحباني شكرا زياد
  • منذ 5 سنوات مجهول مجهول:
    ‫ليه هيك عملت يا زياد
    ‫ليه هيك عملت يا زياد ... ياخيي نحنا كنا قاعدين وناطرين لتطلعلنا بش فكرة تريحنا .. ماكنا ناطرين ابدا مقال مقتبس من نشرة اخبار كنت قاعد عم تتسمع عليها وانت قاعد بالبيت .... يا خيي نزل وشوف روح عسوريا وشوف .... شوف كيف انو في كتير من الشباب الواعي يلي "كنا" بالزمانات نقعد نضرب كاسنا عكلمات واغاني زياد .... مقال مالنا منتظرينو ... لاول مرة بقول وخدها مني من انشان كان عاشق لزياد لو بقيت ساكت كان احسن النا ونحنا يلي كنا عم نشتغل على الشعب يريد زياد الرحباني وبنص الحرب بسوريا قاعدين نجمع التواقيع .. لحتى نشمع كلمة وحدة تحيينا فيها ... لوبقيت ساكت كان احسن
  • منذ 5 سنوات ثريا ثريا:
    ‫الإبن الضال
    ‫ما هو طلع لينين بالآخر الإبن الضال أو إبن الحرام كما هو معروف بالعامية...‏ بس هو مناصر ستالينين لازم يخفف شوية نشرات إخبارية من تعول هول يللي كل خمس دقايق خبر عاجل و يحملو شي كتاب لأ يا خيي شي جريدة لأ لأ منمرقها دليل التلفون أو بقلك شو يقرا الكف أحسن على القليلة بيشوف الطالع والبخت و إذا نقشت منيح بيسير ينافس مايك فغالي وبيعمل إرشين ‏
  • منذ 5 سنوات شكري بك شكري بك:
    ‫متل اللي اشتهى الجاجة واكلها
    ‫متل اللي اشتهى الجاجة واكلها بريشها........ زياد ...الرصيد اللي الك عندي سحبت جزء كبير منو بهالمقالة...انا رجعت اقرأ جريدة الاخبار لشوف شو بتحكي بس,,بالاساس الاخبار فقدت مصداقيتها عندي من وقت اللي وفقت مع النظام ضد الشعب السوري... هلق بقي شوي رصيد ..مقالة او اتنين من هالعيار رح انسى زياد يللي رافقني 30 سنة وربيت على افكاره.........خسارة:)
  • منذ 5 سنوات فيصل باشا/برلين فيصل باشا/برلين:
    ‫زياد اروح لمين
    ‫يا استاذ زياد الجماعة بدن يسمعوا منك كلام اوضح  مش مكتوب برمادي يا ابيض يا اسود،يعني انت مع بشار الاسد او مع غطر ومن يمثلها على الارض السورية،يا خي انت ليش ما بتفهم هالناس انت مع مين،وانك ضد القتل. الحرب يلي كلهم فيها خسرانين مين ما ربح يربح الجزء هو من الكل يلي اسمهم سوريين. يلي عم يموتوا سوريين ،وهيدا الكل يلي منه اجزاء شو ما كانت اسمها،هي بالنهاية قصتهم طويلة سواء كانوا مجموعين ولا مطروحين خبرهم انو الثورة بتدأ بلأول بالعقول وبالعلم وبعدين بالبيوت يلي كل واحد منا فيها ام ديكتاتور او طراطور،ومنها منافيست جاهز من جين شارب ومنها ع الشاشات ،خبرهم عن القصة اللبنانية وعن اسماء الجيوش من لبنان العربي الى اللبناني الى الجيش الجنوبي والجيوش الاجنبية العسكرية والمخابراتية وعن النيمتز والسيبندان الخ خبرهم عن الدنكورة وسينالكو والقدور خبرهم شو يعني حرب وتدمير وقتل وذبح وقنص وخوف وتهجير وطوايف،ومفقودين ومخطوفيين ،وما تنسى المقابر الجماعية(بلا المجازر) ،وعدد سكان سورية مقارنة بلبنان وكم الف ماتوا ببلاش ميشان شو ما مشان شي.اه دورها خي يقطع هالعيشة اذا كانت مع فليحكم الاخوان أهلين فيك واذا كنت مع الممانعة بدن يبهدلوك.
  • منذ 5 سنوات مجهول :
    ‫سلام استاذ نحنا منحبك وين ما
    ‫سلام استاذ نحنا منحبك وين ما كنت ومع مين ما كنت وكيف ما كنت عم تغني او تالف او تنتقد وانت ما تغيرت بس الناس كلن صارو اذا انت مش معن يعني انت ضدن او بالدرجة الادنى بدن يعملو مسح لتاريخك باراء غريبة عجيبة كانه ما بيعرفوك ولا فهموك .بس كانو معك هيك برستيج يمكن وهلق لانه مانن معك صارو عم بنظروا عليك لا والاحسن واحد عم بقيمنا نحنا القراء يعني شو بدي قلك مسخرة اكتر من هيك ما بقى في .كل واحد مقتنع انه معه حق عال كلكم معكن حق افرقونا حلوا عنا نحنا هيك بنحبو هيك شو ما قال شايفينو وما مصدقين الكن معنا شي .منحبو!افهمنا! ما افهمنا!غلط صحح ...ما بهمنا !نحنا ربينا انه هو مع الحق!اذا عندكن مشكلة....شوفو الحق والعدالة والرحمة واللا تعصب وين؟وبعدين اتحفونا باراءكم ...مع انه هاي الصفحة للاستاذ منفضل رايه
  • منذ 5 سنوات أبو الجواهر أبو الجواهر:
    ‫دخلكن انتو اللي بيقولولكن
    ‫دخلكن انتو اللي بيقولولكن الشعب العنيد؟ ع فكرة: إذا بتجربو تشيلو التعصب والطائفية ومشاعركن المهترية ع جنب..رح تلاقو انو المقال بسيط بس عميق.. اسا كل واحد بدو زياد يحكي متل ما بدو-_-
  • منذ 5 سنوات مجهول :
    ‫تحيا سوريا
    ‫رااااااااااااااااااااائع..برافو أبو الزّوز
  • منذ 5 سنوات مجهول مجهول:
    ‫أستغرب كيف يوضع هذا الهذيان
    ‫أستغرب كيف يوضع هذا الهذيان في عمود "سياسة."
  • منذ 5 سنوات مجهول مجهول:
    ‫كم أفتخر أني لم أطق زياد
    ‫كم أفتخر أني لم أطق زياد يوماً، حتى حين توافقت آراؤه السياسية مع آرائي.
  • منذ 5 سنوات fouad fouad:
    ‫الهوس بلينين
    ‫زياد عندو هوس بلينين وستالين والشيوعية و مش احسن تشتغل موسيقى
  • منذ 5 سنوات مجهول مجهول:
    ‫ما عاد حدا ينتظرك!
    ‫ يبدو أنك ما ممكن تفهم سوريا إلا من خلال المنظار اللبناني أولاً: لأنه الظاهر أنه السوريين ما بيهموك إلا بتأثير أوضاعهم عليك كلبناني، يعني وعيك الانساني لذاتك وموقفك وشعورك بالمسؤولية الأخلاقية ما بيتخطى حدود لبنان، وهذا فريد بالنسبة لشخص بيعتبر نفسه شيوعياً! وثانياُ: لأنك منغمس بالشأن اللبناني لدرجة تجعلك لا ترى العالم إلا من خلاله، ولا ترى سوريا إلا لبناناً آخر زياد الرحباني! ما عاد حدا منتظر منك شي! مبروك عليك هالقراء يلي لسة حيقرولك وهم برأيي أحد 4 أنواع: النوع الأول: شامت بانحدار المستوى الفكري لآرائك لأنه أصلاً بيفكر بالدنيا متل ما صرت أنت على أنها معسكرات النوع التاني: متشكك أصيل بدو يختبر صحة أفكاره بأنه يقرا زياد رحباني، يلي كان بيوم من الأيام صاحب رأي مهم شو عميحكي النوع التالت: جماعة الممانعة لأسباب غالباً طائفية: هدول ما بيهمهم محتوى الكلام أو نوعيته وإنما جهته، يعني إذا الكلام مع خيارهم السياسي_الطائفي فهو عال وإلا فمين هاد زياد الرحباني؟ النوع الرابع: جماعتك الخاصين، المطيبين، يلي شو ما كتبت: الله يا عبقري! وهدول بيفهموا عليك حتى لو ما فهمت على حالك متل ما صار من كم يوم حقاً وفعلاً وقت تخربطت مقالتين وتداخلوا ببعض وأنت اعتذرت عن (العبث) مع أنهم كانوا أعلنوا أنهم فهموا كلشي النوع الأول والتاني حيملّوا عن قريب، وما عاد يقروك إلا ليضحكوا، لأنه بصراحة لسة دمك خفيف تتهنى بالنوعين الباقيين زياد! كتابتك ما عاد فيها محتوى فكري مركب مجرد تشويش وترويج لخط سياسي أنت نفسك يمكن ما بتعرف منيح ليش مختاره بس كمان شكلك ما عدت تعرف أنك لازم تعرف ليش مختاره بعتذر عالإطالة موفق بالموسيقا!
  • منذ 5 سنوات مجهول :
    ‫فشر
    ‫فشر قول دريرد الرحباني بس بسهولة صار فيني قول، و من غير ندم- لكن ليس من غير أسف: زياد لحام. أو زياد الطوشي أنسب كمان.
  • منذ 5 سنوات مجهول مجهول:
    ‫حرام
    ‫غبنك يا زياد والله!! هلّك كل هيك صارة علمانية روسيا وايران وبشار وحزبالله؟ خيي خلليك سب باميركا نحنا معك.. بس انو ولو؟! نحنا ربينا ع اغاني ومسرخيات وقضية زياد القديم.. نماما متل قضية دريد لحام..
  • منذ 5 سنوات مجهول :
    ‫غدا الخميس
    ‫ستالين ما مات ، ماركس خيّك ما حكم.
  • منذ 5 سنوات فريال فريال:
    ‫إخت إللي ما بيحبّك
    ‫دخلك قلتّلك إنو كثير كنت مستاقتلك ، صح، إي بعدني مشتاقة
  • منذ 5 سنوات مجهول :
    ‫(محكي)
    ‫(محكي) لف حصيرة.. وشنغل مرتك.. وروح فلشهن عل حشيش خيي زياد لف لفلك شوية أظدي لف دريكسيون وعطيها شحطة وفهمني وين رايح بهل بوسطة , اي والله صرني ساعة بلف باخدو يمين بتروح شمال باخدو جنوب بيطلع ع بعلبك انو اي نحنا رابطة شغيلة, اي تحدوا بس ضد مين ما كل الزعما ضدنا , واذا بتجمعو كل الشغيلة ما بيعملوا شي دون الزعما ع فكرة كنا لبنان الكرامة والشعب العنيد , هلاء صرنا لبنان زيتونة ب والجميزة والشعب العكروت (السينما) كفرتونا بل بلد ما بقى عنا جلد زعما بل وراتة اب عن جد ولد
  • منذ 5 سنوات مجهول :
    ‫كبير يا أبو الزوز أروح لينين
    ‫كبير يا أبو الزوز أروح لينين . . . . . .. . . .
  • منذ 5 سنوات زياد زياد:
    ‫بوتينين ..!!
    ‫يمكن م تحكوا ع بوتينين ..!!
  • منذ 5 سنوات مجهول :
    ‫عيب والله عيب
    ‫عيب والله عيب
  • منذ 5 سنوات مجهول :
    ‫يحرق حريشك يا حج زياد
    ‫يحرق حريشك يا حج زياد
  • منذ 5 سنوات جاسر جبور جاسر جبور:
    ‫غش الكتروني
    ‫عزيزي زياد... اسمح لي ان اقدم لك هذه البرشامة(*): عندما يتجاوز مقالك الحد المسموح به يمكنك بكل بساطة ان تنتظر ظهوره على الموقع الألكتروني وتكتب البقية بشكل تعليق!! ما رأيك بهذه الفكرة الجهنمية؟؟ انك بهذه الطريقة لا تحرم القراء من قراءة المقال كاملا، وبالتالي لا تضطر الى التوضيح!! - - - - - - (*) البرشامة او البرشانة هو تعبير يقصد به الأوراق التي يستعملها الطلاب للغش في الامتحانات. وقد لاحظت مؤخرا، بفضل بعض المسلسلات التلفزيونية ان إخوتنا من أبناء النيل يستخدمون التعبير نفسه للغرض نفسه. والبرشامة أساسا هي ذلك الوعاء الصغير الذي يستخدمه الصيادلة عندما تكون الوصفة الطبية عبارة عن مزيج من عدة أدوية، فانهم يطحنون الحبوب التي يتألف منها الدواء الموصوف ثم يمزجونها ويضعونها في البرشامة. وبالمناسبة نشير الى العلاقة التفاضلية بين حروف الميم والنون والباء. ذلك ان حرف الباء يفضل ان يأتي قبله حرف الميم في اللغات الأعجمية. وقد سألَنا بعض الأصدقاء عن سبب كتابتنا اسم "جمبلاط" بالميم لا بالنون كما هو دارج. ولعل في هذا التوضيح ما يجيب عن تساؤلهم، باعتبار ان جمبلاط هو اسم اعجمي.
  • منذ 5 سنوات علي علي:
    ‫شو غبي اللي راهن على موقف حدا
    ‫شو غبي اللي راهن على موقف حدا كبير متلك يازياد
  • منذ 5 سنوات مجهول مجهول:
    ‫خوات‏ ‏رائع‏ ‏ابنو‏ ‏لستالين‏
    ‫خوات‏ ‏رائع‏ ‏ابنو‏ ‏لستالين‏ ‏هوي‏ ‏بوتين‏ ‏وجدو‏ ‏‏ ‏لبوتين‏ ‏هوي‏ ‏القيصر‏ ‏ فليحكم‏ ‏الاخوان‏ ‏‏