Manifesto | سكايب؟

  • 17

(حوار على الهاتف بين عيسى ومخايل بعد اتصال جاءهما من «البهلول» في أبو ظبي)

ــ مخايل: مش أنا شفت الخبر، تلفن «البهلول» من أبو ظبي لخيّي بعين علق.
ــ عيسى: منين بيعرفو خيّك لـ «البهلول»؟
ــ مخايل: من عين علق.
ــ عيسى: ليش «البهلول» بيجي عا لبنان؟
ــ مخايل: لأ خيي اشترى تلفون دولي.
ــ عيسى: ولشو جابو دولي؟ يجيبو عادي، الدولي نكبة.
ــ مخايل: لأ ما هوّي سيلولير منّو دولي.
ــ عيسى: شو قلّو طيّب؟

ــ مخايل: خبَّرو إنو «الحكيم» كان عم يحكي اليوم بالنهار عالتلفون وخيّي ما لحّقو من الأول.
ــ عيسى: ليش خيّك بيطلع عا معراب؟
ــ مخايل: لَه بعين علق.
ــ عيسى: وشو عرّفو إنّو «الحكيم» عم يحكي عالتلفون بالنهار؟
ــ مخايل: ما «البهلول» خبّرو.
ــ عيسى (نرفز): ما عم تقول إنو «البهلول» بأبو ظبي!!!
ــ مخايل: إيه وإذا... ما التلفون لشو؟
ــ عيسى: والله؟ صرت تعرف بالتلفون إنت وخيّك؟
ــ مخايل: أنا ما بعوزو بس خيّي عم يضطرّ يحكي عا أبو ظبي (قاطعه عيسى)
ــ عيسى: يا خيّي خيّك بأبو ظبي و«البهلول» بعين علق عفواً (قاطعه مخايل)
ــ مخايل: عيسى، «البهلول» هوّي اللي بأبو ظبي.
ــ عيسى: والله فهمت بس «الحكيم» وين؟
ــ مخايل: «الحكيم»؟ الله بيعرف وين.
ــ عيسى (متابعاً): و«البهلول» من أبو ظبي هوّي الوحيد اللي بيعرف وين وشافو عالتلفون؟
ــ مخايل: مزبوط، عا تلفون التلفزيون (مصحّحاً).
ــ عيسى: تلفون التلفزيون؟
ــ مخايل: هيدا إيه / خيّي بعد ما جاب منّو هيدا، التلفزيون عطاه واحد منّو لـ «الحكيم»
ــ عيسى: أيّا تلفزيون؟
ــ مخايل: الـ «إم تي في».
ــ عيسى: إيه...
ــ مخايل: فصار يحكي عليه ويطلع عالتلفزيون.
ــ عيسى: و«البهلول» يخبّركن إيّاها عالتلفون...
(يتبع بعد غد مش أكيد إذا ضروري، الجمعة 5 تشرين الأول)

■ ■ ■

بلاد الزيتون والخروع


ــ كريستوف: في بالطبيعة عدّة أنواع زيت، وإجا المجتمع (المجتمع ونقطة وبس، أوكي؟ وأوعا حدا يقول المدني لأنو إذا بدكن تضلّو كل ما تقولوا المجتمع تقولوا وراها المدني، بتكونوا عم تحركشوا بالمجتمع العسكري وانتو هيدا مجتمع ما بتحبّوه فذوقوا وسمّوا الإشيا بأساميها، المجتمع هوّي كل شي مدني حتى المدني اللي بيعمل عسكري لأنو الديمقراطية المدنية تبعكن بتحميها بطلب منكن، الديكتاتورية العسكرية... وولا كلمة). إذاً كنّا عم نقول إنو المجتمع زاد على زيوت الطبيعة، زيوت مطوَّرة، يعني مارقة بـ «تصنيع» معيّن أو معالجة، آخرهم زيت الصويا بعتقد، اللي صار إلو أتباع. هلّق مش قد زيت دوّار الشمس اللي دخل علينا بفترة تاريخية أقدم، واللي ما قدر بعد الزيت النباتي الآخر يخفّف عن مجموع المواطنين (المدنيين والعسكريين) استعمال زيت الزيتون.
هلّق ما فينا نعمّم لأسباب ديمقراطية إنو زيت الزيتون هوّي الأطيب (شو ما كانت الماركة، خرا عالتجّار، بس فينا أكيد نقول إنّو في عنصر مهمّ بزيت الزيتون، وهوّي إنّو أساسو أكلة بحدّ ذاتها وأساسية وهيّي الزيتون. في ناس بتاكل بس زيتون، وأكيد ما فيهن يلفّوا عروس دوّار الشمس مثلاً، وأكيد حدا جرّبها وبزقها لأنو طعمتها متل طعمة التجّار). الزيتون أكلة أساسية وزيت الزيتون أساس بأكترية الأكلات الباقية، والمعارضة مش قادرة تعمل شي، المعارضة عم تنصح عالريحة وعالاغتراب. نحنا منصبّ أحياناً زيت زيتون عالزيت النباتي والمقلي، تصوّروا، مش ضروري تتصوّروا تفضّلوا دوقوا أوقات بيزبط الأكل المش زابط، بكلّ أنواعه، إلّا المعارضة ما بتزبط، ليه؟ قد ما فيها خلّ! سيّدنا المسيح وبزق الخلّ وما أثّر عليه تحالف القوّات والمستقبل، ضلّ عالصليب لجابولو ميّ!!!
يا زلمي مش معقول ليك قدّيه الفرق كبير بين زيت الزيتون وزيت الخروع.كوم.نت// شو هائل @ رهيب.كوم> الناس بتقلّك بالأوّل ما رح آخد خروع! ما بتقول لا آكل ولا إشرب خروع، ليه؟ لأنو لا سائل (عن حدا) ولا جامد. بيقولوا بالأول «ما بينبلع» وبيرجعوا بيضطروا يبلعوه، ليه؟ لأنو إذا بدّن إنو الأكل اللي أكلوه قبل واللي أكتريتو فيه زيت زيتون، يضهر بس يصير وقتو ـــ ولسببٍ ما متل صورة بسكلات مهدّايين فيها وزير الداخلية والشيخ الأسير وعم يضحكوا عا مدخل صيدا، مش بس عا مدخل صيدا، أهالي صيدا عرفوا عا شو عاد طلع الضحك ـــ بدها زيت خروع... يا خيّي وإجوا هاليهود عابلاد الزيتون، الزيتون اللي طالع من أرض هيّي لإلو متل ما هوّي إبنها وإلها. فلسطين إمّو أكيد وإمّ اللي بيجوا يقطفوه واللي عايشين حدّو ومنّو وتحتو وحواليه، وإجوا هاليهود بدّن يضهّروا، بدّن يضهّروا شجرو وزيتونو وبيوتو، ليه؟ لأنّو هيك بيعمل الخروع عا أساس عم بيضهّر الأكل بيضهّر شو ما بيطلع بوجّو. وكيف بحياة حريمك بعدن الأميركان بيفضّلوا زيت الخروع عا زيت الزيتون؟
ـــ أنسي: واضح منين الخرا كلّو*.
*عا أساس أنسي بيفضّل الجوابات القصيرة بالسياسة العالمية

17 تعليق

التعليقات

  • منذ 5 سنوات جورج جورج:
    ‫سوري (قصدي المعذرة)
    ‫علقنا مرة قمتو علقتونا ،. ما كنت مفكر انو القصة فيها دراسة وتمحيص بيص بس حبيت سلم ع زياد الغالي وشكراً
  • منذ 5 سنوات عصام عصام:
    ‫عكس المدني ليس عسكري يا سيد زياد
    ‫عكس المجتمع المدني هو الاقطاعي. ونعم. اعرف انك تمزح ولكن فكر فيها.
  • منذ 5 سنوات مضر مضر:
    ‫يا زياد..
    ‫يا زياد، وقّف مع الشعب. بحياتك، بحياة اللي بتعزّن، وقف مع الشعوب كلها المعترة، بلا تعقيد، كون -بصراحة- ضد الظلم، ضد القمع، ضد الكبت والقتل عالرأي وين ما كان. هيك بهالبساطة، وبعدها قول شو ما بدك، وكون، سياسياً، مع مين ما بدك. - مُحبّ ما قدر يكرهك لهلأ..
  • منذ 5 سنوات مجهول :
    ‫سلام استاذ ناطرينك الجمعة على
    ‫سلام استاذ ناطرينك الجمعة على امل نفهم شو بدو غسان بن جدو ما بدنا نفهم قدو بس عل القليلة نفهم عليه اولك شو بدو؟ منك ؟مننا؟ من مين ومع مين وع مين ؟
  • منذ 5 سنوات البهلول من ابوظبي البهلول من ابوظبي:
    ‫للامانة التاريخية
    ‫يبا انو عم نرك عالايميلات ماعم نوصل لنتيجة فا وصلنا خط "سيلولير" تنحاكي الحباب ولشو اذا بحقي كل هالارهاب .. اشتقنالك يا ريس
  • منذ 5 سنوات مجهول :
    ‫الله يا أبو الزوز!
    ‫الأجمل على الإطلاق!
  • منذ 5 سنوات مجهول :
    ‫مش قصة هاي.
    ‫هذا أجمل ما كتب زياد في "الأخبار" (إذا استثنينا سلسلة المقالات المتعلقة بالطوائف تحت "ما العمل؟" لمن يذكر). للمناسبة، أنا لستُ من "عبدة" زياد، على ما يقول البعض. لهؤلاء، نقول بكل محبّة، لا تغرقوا بموقفٍ معادٍ وتتمسكوا به حتى عندما يختلج في صدوركم وعقولكم شعورٌ إجابي تجاه ما يكتب زياد. انتقدوا حيث اللزوم ولا تتمسكوا بانتقادات وأكحام مسبقة حيث لا لزوم لها. هذا جلد ذاتي أمام الملأ وندمٌ في السرّ. يا ناس لا تنسوا أن جزءاً من وعينا هو من صنع زياد. يعني من أعماله. يعني: بحث، تفاني، تعب، سهر، حرمان، وحدة، ذكاء، موهبة، ضمير إنساني ومهني،... كل هذا وضعه زياد بتصرّفكم، ومن دون مقابل. كلنا شربنا من هذا البئر. لا تردموه. كل لحظة موسيقى عملت في نفوسنا فرحاً ونشوة، كلفت زياد الكثير. كان بإمكانه أن يكون عمره 56. لكنه الآن في الـ76 جسدياً. أرهق العمر باستغلال الوقت. وقت الراحة، راحتنا. وقت النوم، نومنا. وقت الترفيه، ترفيهنا. وقت الحب الذي لا يكرسه زياد للاهتمام بالحب. الوقت الضروري لرعاية أي حالة حب. مرّ الحب بزياد، فوجده منهمكاً بالعمل. أخذ زياد منه ما يفيد العمل. ثم تركه، ويا للعذاب في التخلي عن الحب، عندما رأى أن الوقت الإضافي في التمسك بالحب سيكون مفيداً له وليس لعمله، أي ليس لنا. كيف تشتمون زياد وتستمتعون بـ"سلّملي عليه"، بـ"سألوني الناس"..؟! الأسوء: ذروة التفاني تصل بزياد إلى الفرح لأجلكم عندما تستمتعون بهذا الجمال، ولو شتمتموه. "افرحوا واشتموني، لكن افرحوا".
  • منذ 5 سنوات علاء علاء:
    ‫تصحيح إملائي في المحكي
    ‫الرائع زياد .. تستعمل غالبا مختزل حرف الجر على ، عَ، ولكنك تلصقها بالكلمة التي تليها .. والصحيح هو كتابة العين مفردة وهناك شاهد قديم على هذا الاستعمال يؤكد أنه فصيح، ورد في كتاب يحمل عنوان " المبسط في النحو والإملاء - الانتشار العربي ": كما يمكن استعمال مختزل "على " أي حرف العين " عَ " كحرف جر كما هو الحال في العامية مع أن أصل هذا الاستعمال فصيح و يوجد عليه شاهد من الشعر القديم جدا قال الشاعر : ولما طفت عَ الماء بكر بن وائل وعجنا صدور الخيل نحو تميم
  • منذ 5 سنوات مجهول مجهول:
    ‫Manifesto - سكايب
    ‫معك حق يا زياد زيت الزيتون هوّي الأطيب وكل شي حكيتو مزبوط...
  • منذ 5 سنوات مجهول مجهول:
    ‫دخيل ربك ما احلاك استاذ ذياد.
    ‫دخيل ربك ما احلاك استاذ ذياد.
  • منذ 5 سنوات زينة زينة:
    ‫لك يقبرني ربّك وربّ أنسي سوا
    ‫لك يقبرني ربّك وربّ أنسي سوا