Manifesto | نشرة المساء

  • 21

ـــ (محكي) أيمتى بتصير الصداقة مسبّة؟

ـــ بس يطلبها الواحد من التاني بديل عن الحبّ.
ـــ إيه خرا عالحبّ لكان.
ـــ طبعاً.
ـــ الصداقة بتقبَلو للحبّ، بس الحبّ مش راضي بحدا. من هيك صعبة يزبط "الخِرْيو".
ـــ من هيك بتآجر فيه الصداقة إذا حَبّ يرجع وجّ الضو. إنو هُوّي الحبّ يابا، وآخر شي حابّو هلق، يرجع وجّ الضو. ع أساس هوي شو؟؟ المَلَك.
ـــ خرا عا أتخن مَلَك، هيدي الصداقة نايمة وما في قوة بتوعّيها.

ـــ إيه ومعها حقّ، بس هوي رح يستفيد من إنو الصداقة ما عم توعا وما فارقة معها، ليفتح سيرة شو؟؟ الأخلاق، إنو وين أخلاق الصداقة يلي بتحكوا عنها؟!
ـــ ما في مشكلة، الأخلاق ما بتردّ عا مين ما كان، خاصةً عا حبّ مطَرْطَر، كل ساعة بيحِبّ حدا. بالأخلاق بتحِبّ شخص واحد.
ـــ وإذا حَبّ حدا غيرها؟
ـــ بسيطة، يعني صار بلا أخلاق. فدغري قوم حِبّ غيرو انقِلِع.

■ ■ ■


ـــ ... اممممم (إنّه يَعِنّ)... أهه (على أثر تفكير) ليك؟ هلق غير إنو بدَّك تبَلِّط البحر... البحر كلّو... بدّي أطلب منك شي كمان، وافْهَمْني أرجوك... ليك؟ ما بعرف كيف بدّي قلّك اياها، بلِّش هلق إنتِ!!
ـــ بشو؟
ـــ بلِّش بَلِّط.
ـــ شو هالحكي، كيف بيبلّطوه للبحر؟
ـــ اسآل «سعودي-أوجيه»، أنا ما عم قلّك البحور كلّها، بَلِّط البنك/عفواً... البحر الأبيض المتوسِّط. هيدا بعدو متوسِّط؟ هيدا صار بالع كذا بنك... وكذا جنينة كمان عا طريقو، ما بتكون جنينة قدّام البنك مثلاً... إيه بلاها... وإذا في شي Parking حدّهن، صار بلا شغل... فخِدو وحطّو عا جنَب بلكي بيصير كافيه... وما في شي عم بيكَفّيه.
ـــ (استفسار) مين أوجيه؟ بعد في أوجيه؟
ـــ بـ ـعـ د ... فـ ي ... أ و جـ ـيـ ـه؟! (استغراب شديد مع تنطيق حرف بحرف) إنتِ وين عايش؟
ـــ أنا قليل ما إنزل عا بيروت، وهلق جاييني وظيفة بالعراق... مش أكيدة.
ـــ أهه... العراق! إيه مبروك ما أوجيك.

■ ■ ■


(شخصيْن بشارع فرعي ماشيين)
ـــ فتِّح فتِّح أحلى ما تِعْبُق الريحة.
ـــ شو بدي فتِّح، ما نحنا عم نحشِّش برّا يا بلا مخّ.
ـــ عم نحشِّش برّا؟ (بدهشة زايدة) إيه سكِّر سكِّر لكان، يخرِب بيتك كيف ما بتنتبه لهيك شغلة؟

■ ■ ■


ـــ (هُوّي مسترخي بالتخت) شو بحب هالنمَش للي بضهرك وعا كتافك (غزَل)، بمووووت فيه.
ـــ (وهيّي عم تلبس تيابها) هودي سرطان حبيبي وأنا للي رح موت فيه مش إنت، كفّي للي كنت عم تعملو وبلا غزَل بلا مخ وقاتولي (وعم تزبِّط اسكربينتها)، إذا السرطان بتموت فيه، ما تفكِّر إنك وحدك، أنا كنت بفضِّل تموت فيّي!
ـــ ليش شو بدَر منّي حياتي؟
ـــ ما بيبدُر منّك شي... دومري ما بيطلع منك بهالليل... باي. (وطبشت الباب).

21 تعليق

التعليقات

  • منذ 5 سنوات برناديت برناديت:
    ‫نشرة المساء
    ‫"مبروك ما اوجيك"... كتير كتير حبيتا فجة وواقعية...
  • منذ 5 سنوات سليم عطاالله سليم عطاالله:
    ‫محكي !!
    ‫يا ريت فينا نسمع هالمقالات بعمل صوتي مسموع بس ما فهمت وين محكي ؟ حدا كان عم يسجل ؟
  • منذ 5 سنوات مجهول :
    ‫سعودي-أوجيه حدث ولا حرج,
    ‫سعودي-أوجيه حدث ولا حرج, ردموا و دموا و استغلوا و بعد ما شبعوا. معتبرينا جمعية خيرية بالسعودية و منشار عالطالع اكل و عالنازل اكل. يتبع ....
  • منذ 5 سنوات مجهول مجهول:
    ‫قررت أن أتظاهر أني فهمت ما
    ‫قررت أن أتظاهر أني فهمت ما يرمي إليه زياد والآن سأقول "رائع."
  • منذ 5 سنوات أنا أنا:
    ‫كل يوم بسمع و بشوف الأخبار
    ‫كل يوم بسمع و بشوف الأخبار بتطلع تركيا بالنص و بسترجع مسرحية بخصوص الكرامة!!!! شكرا للتنويه من شي عشرين سنه بس ما فى حدا يسمع!!
  • منذ 5 سنوات ziad ziad:
    ‫ليش هينة اذا الاخلاق ..
    ‫ليش هينة اذا الاخلاق .. خذليتك و ما ردت عليك و خود عا تعذيب ضمير وهيدا كمان اذا متوفى بتكون صرت هايم في بلاد الحب .. يا سلام سلم .. ليش دخلك ... ازا طالبت بالصداقة بديل الحب ما بتكون عم تعمل شي و عم تحاول تفيقا للسايبة ,, بس فيه هلق بتجيب شوال مبررات و كل شغلة بتحطلا مبرر من هون مبرر من هون وهيك انت وساحب .. و بضلك ساحب و صاحب من وحدة لوحدة ..
  • منذ 5 سنوات ziad ziad:
    ‫والله ... اذا الواحد بيبلط
    ‫والله ... اذا الواحد بيبلط قدام شي بنك .. الا ما تصيبو شي طرطوشة .. من خزنة الى الى ... ولكن تبليط البحر اجدى خيي انا عم قلك اجدى واوفى ... المهم هلق البحر قدامك والبلاط عاجنبك والعدو دخل فيك شو بتعمل بالله ما بتبلط ولا كيف
  • منذ 5 سنوات ziad ziad:
    ‫لك هوي الحب بحد ذاتو بلا
    ‫لك هوي الحب بحد ذاتو بلا اخلاق .... بس وقت اللي بتفكر انو الصداقة اهم ... مدري ليش بتنام معك الصداقة او من الطرف التاني بنيما ....الحبل السري بين التنين اي مستحيل ملك يقدر يشوفو او يتصل من خلالو ...
  • منذ 5 سنوات ضحى جعفر ضحى جعفر:
    ‫رائع ...... كلماتك رائعة في
    ‫رائع ...... كلماتك رائعة في هذا الزمن المفجع
  • منذ 5 سنوات أيمن كنيفاتي أيمن كنيفاتي:
    ‫تحياتي رفيق زياد الرحباني .
    ‫تحياتي رفيق زياد الرحباني .. مع كل حبي واحترامي لك وكلامك يلي بجهز جيوش ويعمل ثورات.. وبعد.. أكيد إنت ما بتستغل حدا أو بتاخد بدل شغل حدا، لئن هيك الشيوعيه علمتنا .. لكن مؤخرا ومع مقالاتك يلي آخذي نوع جديد من الاسلوب عم تسرق واقع مقالاتي في مدونتي الالكترونيه . أنا أكيد إنو ما فيني زايد على حضرتك في الاسلوب وفن الكتابه، ولكن أنا شاب طموح مناضل في هذا المجتمع يلي ما بيرحم حدا ، لذلك اقترح عليك أن ترجع إلى اسلوبك السابق وتترك لنا هذا الاسلوب لنعتاش منه. وشكرا جدا لك. مع كل احترامي ، أيمن كنيفاتي
  • منذ 5 سنوات عباس مراد عباس مراد:
    ‫بعد في بواب
    ‫عمالك تقول طبشت الباب اذا كان بعد في بواب ما هي مشرعة ومشرعنة يا زياد!!!وما الها عتبات
  • منذ 5 سنوات محمود شحادي محمود شحادي:
    ‫افكارك تظل حبر على ورق الا اذا...
    ‫الرفيق زياد عاصي الرحباني نحن كشيوعيين نفتخر بك لانك تنتمي على الاقل فكريا للحزب الشيوعي اللبناني الذي اعلن في وثائقه مؤخرا بان هدفه الاشتراكية العلمية ولديك طاقات هائلة لا توظفها بهذا الحزب بل تحاربه الى جانب من يريد تأبيد النظام الراسمالي والطائفي. ان افكارك الرائعة تظل حبر على ورق اذا لم توظفها في داخل الحزب في منظماته الرجاء نحن نحتاج اليك ولامثالك من اصحاب الفكر الماركسي اللينيني والستاليني داخل الحزب لاحداث التغيير اذا رغبت به
  • منذ 5 سنوات مجهول مجهول:
    ‫والله يا استاذ ذياد انت سابق
    ‫والله يا استاذ ذياد انت سابق عصرك 10 سنين بكل شي. رائع انت
  • منذ 5 سنوات رامي رامي:
    ‫التعليق للاعجاب و ليس للتعليق
    ‫ يجب على العلماء الاستفادة من آلية عمل المشابك العصبية لزياد الرحباني ....فأكاد أجزم بأن الشخص العادي(عادي من العادة وليست استخفافاً) يقرأ ما يكتبه زياد 3 أو 4 مرات لتبدأ مشابكه العصبية بالتجذب ايذانا بالاستيقاض ....فأحسب عزيزي القارئ كم من المرات للقراءة يحتاج لكي يفهم
  • منذ 5 سنوات مجهول :
    ‫يعني على آخر نكتين، صار زياد
    ‫يعني على آخر نكتين، صار زياد الرحباني خرج يطلع ببرنامج "LOL" !!! ولو، وين السهل الممتنع؟ صار سهل معمم!
  • منذ 5 سنوات نورا نورا:
    ‫اليوم مش زابطة
    ‫مش زابطة كتير اليوم . اسلوبك على راسي وعيني بس لما كلمة من هونولولو وكلمة من جزر الواق واق .. ما بتركب لو شو ما حاولنا نركبها .
  • منذ 5 سنوات مجهول مجهول:
    ‫طق حنك
    ‫من المفروض أو المتوقع أنه تكون الصداقه أفضل من الحب الأول والدول الناميه! هلق وبما أنه الدول الناميه والحب موجودين في حالة سبات , من الحتم أن تدخل الصداقه هي الأخرى في سبات! أو شو!?!!!
  • منذ 5 سنوات مجهول :
    ‫إلى زياد (من بعد بن جدو و من
    ‫إلى زياد (من بعد بن جدو و من بعد كل شي ومن بعد االشي اللي ما إجا و حيجي): " نحب ما تكتب لكننا عندما نراك ونعاشرك ينتقل بسرعة حبنا من شخصياتك إليك " (واسيني الأعرج). ... ^_^
  • منذ 5 سنوات عاشق اخت المساء عاشق اخت المساء:
    ‫مساء الخير
    ‫مساء الخير