بثّ أمس تلفزيون الـ«أو تي في» تسجيلاً صوتياً، قال إنه للنائب ميشال المرّ، ويوجّه فيه التهديدات إلى أحد كهنة الطائفة السريانية. وألحقت المحطّة بهذا التسجيل شهادة للأب إلياس عكّاري، خادم رعيّة السريان الأرثوذكس في السبتيّة، يؤكد فيها تعرّضه لمجموعة من الضغوط، مشيراً إلى أنّ «الأشخاص الذين يقومون بهذه التهديدات أصبحوا معروفين». وجاء في نصّ التسجيل الحوار الآتي:
- صوت المرّ: شو عملنا مع السريان؟
- صوت الأب: ولا شي.
- إذا المطرانية مديونة للبنك المركزي، جينا سكّرنا الدَّين، عم تحتج؟ بكرا شو بتصير تقلّي المطران بدو يمرّق إبراهيم كنعان؟ بعرفك. وجّك تعبان، كان ضميرك عم يوخزك. لو كنا نحنا الروم ما منآمن بتوبيخ الضمير، بس بالنتيجة مبيّن على وجّه. وينو جورج صولاج؟ مش قدّامك قلتلّو كان وجّك مصفرّ. في عشرين سريان كاثوليك، بفرجيك أساميهم؟
- ما وزّع الأوراق؟
- قلّي شو موزع غير هودي؟
- كل يلّي وزعناهم لمّيناهم، بعد في شي 7 ـ 8 ـ 10 أصوات
- روح وراهم جيبن.
- بأمرك.
- إذا تبين إنو بعد في صوت؟
- صارت واضحة الليستة مبيّنة.
- أنا حكيت مع وزير الدفاع، قلتلّو في مشكل معكم، مع خوري السريان، يمكن نضطر نوقفّو الليلي بالليل بجرم اختلاس، بجرم كذا وبجرم كذا. قلّي: ببعتلك هلّأ دورية مخابرات. قلتلّو: لا. لأنو كرمال المطران. أنا بحب المطران وبحترمو وبحبّ السريان
- يعطيك العافية.
- ما بدي يقولوا إنو خوري السريان توقّف، والمخابرات عم يضربوا! بكرا شو بدك تعمل؟
- بكرا رح أقعد في بيتي.
- بركي من البيت بتوزع أوراق، معش مِنأمِّن هلأ. كنت معزز ومكرم. ويلّي بدك اياه، مش بس بالانتخابات، اللي بدك اياه بالأربع سنين. لما تقول أنا مكسور على مبلغ كذا، وعندي مشكلة كذا. منقلّك ميّل على العمارة. خذهم وما بيكون في انتخابات. يللي بدك اياه كنت عمتعملو. جيت من جبارة 3 ايام ومعك زلمين، طلعوا بالنتيجة كل واحد أخذ 2000 دولار. خلص وصلتلو حقوقه. مظبوط ولّا لأ؟
إذا منشوف أبونا عكاري بكرا عالطريق، ما بيكون اسمي ميشال المر. إنت غلطتك كبيرة، الطائفة السريانية عليها دين 200 ألف دولار بالبنك المركزي.
- أنا بالعكس، قلت لك...
- روح أنا بسكّر الدَّين، بنهي القصة، وإنت موجود.
وأشارت أمس مصادر مطّلعة على أجواء المطرانية السريانية، إلى أنه إثر بثّ هذا التسجيل سيحضر مطران الطائفة السريانية في حلب إلى لبنان للقيام بالتحقيقات اللازمة حول ملف الدَّين المترتّب على المطرانية. كذلك أشارت المصادر إلى أنه سيجري استدعاء الأب عكاري إلى حلب للهدف نفسه.
(الأخبار)