Manifesto | فايت بالـ 57


زياد الرحباني
أنا مواليد الـ 1956، والسنة، يعني بآخر الـ 2012، كان عمري بعدو 56 سنة. حسّيت بعد ما انتبهت لتطابق الرقمين، في مرتين، 56 يعني، إنو لو خلقت سنة 1900 كان يوم عيد ميلادي الأول يعني نهار اللي الله خلقني، أو إنو سبحانو بيخلق اللي عا شاكلتي، كان بيكون 1/1/1956 عيد ميلادي الـ56، وفهمت شو يعني أقصر مثَل شعبي: اللي خلِق علِق. وأحلى شي بس صبية معنا بالشغل يخطر لها، وما بعرف ليه، تصحّحلي أنا وعم بشكي عمري البلدي الضايع بجملة كتير فخورة فيها: «أعوذ بالله غلطان إنت 56؟ بعدك شب». وأنا قبل ما فتت لعندها، مجاوب شب عشريني: «بالرابع حبيبي» لأنو سألني المحامي: «أي طابق يا حاج؟»... بعدني شب عا أساس!... النسوان كذابين... أوكي هلق بدن ينرفزوا النسوان، لكن، هيدي يلي بتشتغل معي بس كذابة. أساساً عيد ميلادي الـ56 اللي ما احتفلت فيه إطلاقاً، ومتل العادة ولأسباب جاية من العقد النفسية المراقبة واللي ما بتشفى... ومش فارقة معي، وآخر همومي. مش بس عيد ميلادي ما طايقو، عيد الميلاد كيف معقول طيقو إذا مش طايق عيد ميلادي. انتو منتبهين إنو عيد الميلاد بحضّر لعيد ميلادي؟ يعني معقول إذا ما اختفيت من البيت عا راس السنة، يكفوا لعندي الرعيان والمجوس...! انتو متصورين المجوس بشارع الحمرا قاعدين بقهوة كوستا ناطريني ومارق مسيرة لمجموعة شباب وصبايا وكلن كول (COOL) ولابسين ومتقلين، ماشيين مفرطعين لأنو إذا رصّوا الصفوف بيعبّقوا، ومفكرين إنو هاي مظاهرة ضد الطائفية ومع حرية التعبير والغرافيتي. بعدين بـ1/1/2013 اللي مرق، يعني آخر عيد مولد، لهلق ما عرفت لو احتفلت بمولدي، بشو كنت بكون عم بحتفل، بالـ56 سنة ولّا بالـ57 ولّا بالـ2013 اللي مرقت نسبياً عا خير، وما عبّرتو وتركت الخير لقدّام! الناس بتقول مطبّق الـ56 وفايت بالـ57 وهيدا اللي صار بالظبط. وقفت شوي قدّام الـ57، اتطلّعت ما شفت في حدا، شي الساعة 4 وجه الصبح كانت، يعني شي ساعة قبل ما خلقت، وحملت حالي وفتت. فتت بكل عزم خاصةً إنو مش فارقة معي العمر قدّ ما فرق معي قبل. كنت إعتبر عمر الـ40 هوي عمر الـmenopause عند الرجال، طبيعي لأنو بَيي كان كل الوقت أكبر مني، فهلق ما عاد فرق معي شي. يعني فتت فوتة بالشهر الماضي لو كاين في بوليس أكيد كان صوفر ولحقني عا أساس أكيد ما معي دفتر سواقة، يعني تماماً متل ما فات الرئيس مرسي برؤساء دول أوروبا بعدي بشهر، بس هوي بألمانيا كان، يعني الأسبوع الماضي كان مرسي عم بصرّح وبصراحة تامة إنو: «الغاز والـ الألكهول donti mix!» ولا بحال، والحضارات الإسلامية والمسيحية: «مختلفة مش لازم تكون فرسوس (Versus)»... قالتلي امي مرة، قدّ ما أصرّيت أعرف أيا ساعة الله خلقني، إنو خلقت وجه الضو، شي الساعة 5 فجراً، يعني بترم معظم العالم بعدا نايمة وبفتكر مغمّقة، ما شتوية ما تنسوا 1/1/...195، مش همّ. ما حَيلّا 1/1 يعني شتوية فكيف إذا واحد وحدو؟ مفروض يكون نوح ناطرو شي محل وما راح يمشي إلا ما يوصلوا المجوس! صراحة أنا ليلة راس السنة الماضية هربت من البيت بكّير، ولاقتني مَرا مطلقة وصديقة من كذا سنة، وكان ممكن الـ57 تبلّش بشي إشارة خير، إنو ننوي عالخير، وهيدا الشي اللي أنا عم بعرضو. انما هيي مش عارفة إذا رح تحبّني أو لأ، فزادت عندي الحيرة وما ناقصني وبهالعمر، ومني شب والهن شي 5 ــ 6 سنين بعيّطولي حاج، والبنت اللي بتشتغل معي كذابة كبيرة ... أكيد لأنو هاي المَرا اللي مطلقة عا راس السنة خبّرتني ليه ضايعة، وخبرتني كمان إنو من زمان كانت تحبّني كتير وأنا مستلشق وقاعد مغروم بوحده بتسوى صرماية، وإنو بالوقت اللي هيي طلّقت وصارت وحدها، كنت أنا رايح جايي مع «الصرماية». فقامت هالمرا اللي كتير بحبها واللي صحيح إنو ما عبّرتلها قبل، قامت فاتت بعلاقة مع شخص فايت بالـ62، يعني أنا قارطو بخمس سنين مينيموم. فات قبلي هوي وما شفتو قد ما فات بسرعة، وحتى لو شفتو ما بعرفو، وطبيعي لأنو بس فات أنا ما كنت، خاصةً إنو مش فايت بـ1/1، هيئتو فات مع مجموعة ضربة وحده... وفوق الدكّة تركها فجأة بعد علاقة دامت 6 سنين، فبعدها كتير مجروحة وعم تجرب تستوعب شو صار. طيب أنا شو بعمل بهالوقت وين بفوت؟ فتت بالـ57 أوكي، هلق يا ريت كان فيي فوت بالـ59 دغري، وأنا أكيد ما رح يفوتني شي. ليك إنت الأسير وين صار، جمعة بكفرذبيان وجمعة بعبرا شرق صيدا، بالمتن سكي وبعاصمة الجنوب إستشهاد. ومدري ليه ما بيعمل خطواته السياسية المبكّلة قد ما مدروسة وموزونة وشرعاً لا تجوز إلا بين حلفائه من الموارنة والسنة! واللي ألذ من الأسير وزير الداخلية شربل، يلي خرع المذيعة بالـNTV خرعة عادةً لو غيرو ما بتمرق عالهوا، وضدو هيي لأنو نكر إنو الأسير مسلّح «بكل شفافية» والأسير وراه بالمحطة عالشاشة عم يلعب كلاشن وترس بعبرا، بركي حزب الله بياخد عِبرة! وبس دلّتو المذيعة للوزير شربل عالأسير جاوبها إنو هوي ما عندو تلفزيون... هل بعد في حدا بلا تلفزيون؟ غير الوزير شربل طبعاً. إيه شو بدو بالتلفزيون ما هوي بضلّ بالتلفزيون، هوي بيطلع عا كل التلفزيونات، أي ساعة بدو يشوف تلفزيون، إنو نحنا دايماً منصدّقو؟ خوا علينا خوا (أنا صرت الدغ بالـ57).

التعليقات

شكراً على هالصبحية الحلوة

شكراً على هالصبحية الحلوة

العمر كلو

وانشالله بال 2056 بتفوت بال 100 أنت بس أنوي عالخير و فوت ! .. إنما أنا مش عارفة كيف ممكن أي مرا تكون مش عارفة إذا رح تحبك أو لأ حتى لو كانت مجروحة.. أنت بلسم يا حاج !.. بشرفي أنا لو محلها كنت رح كون عارفة بس سبحان الله كلو نصيب !

س سؤال

صار عمرك 56 او بالأحرى فتت بال57 وهلأ اكتشفت انو الي معك بالشغل كذابة او السنة هاي متل الي قبلهاوالي بعدها وانو المطلقة بس انت صار بدك ياها رح تكون بطلت متاحة لإلك ورح تكون ضايعة او انو وزير الداخلية ب لبنان عامل وزير إعلام (حتى ما نقول شي تاني) او انو حزب الله قاعد بس عم يتفرج أو إنو إلخ إلخ إلخ!! كأنك تأخرت لتكتشف كل هو!!!!!!! أحسن من غيرك عالقليلة اكتشفتن..

سؤال لزياد

هلأ ليش لمتلك لما بيحكي عن النسوان هيك بيتصهصنو النسوان و بقولو ياي شو مهضوم؟ و لمّا لمتلي ("مواطن عادي" ) بيحكي هيك بتهيج و بتميج النسوان و المثقفات منهن بيطلعو بنظرية الجلاد و الضحية و البيئة الذكورية و الغير المثقفات يكتفن (او يكتفين؟) بكيل الشتائم؟ قولك ليش؟

ما بدا فلهوية

خيي ما بدا فلهوية كتير يعني بقولوا الصبايا هيك لانو مهضوم هوي و انتا سأيل ما تواخذني يعني عرفت هلأ لي؟

وال58

قريبا" بتفوت ومنفوت معك يا زياد بأل58,وهون ما بقصد ألعمر ألملعون إللي ركب ببوسطة عين الرمانة ورايح صوب عين الحلوة ,قصدي أل58 إللي هي كانت بروفة (preuve)لل75 أو مثل ألصور المتحركة إللي كانوا يحطلونا ياها بألسينما قبل ما يبلش ألفيلم ألأميركي ألطويل...إنت زعلان يا زياد لأنو ألمحامي ندهلك يا حاج ,أنا أكلت بوكس على نافوخي من وحدي بألحي عندي كنت صالي عليها إقتربت منها في محل ألمناقيش جنب ألبيت وقلتلها بونجو(غ) bonjour(أنا متلك, يا زيادأوقات بلدغ بألراء بس بحط ألغاء مطرح ألراء مش متلك لفظك تقيل وبتحط ألواو,و ألواوا)فردت علي بكل تهذيب وإحترام بونجو(غ) bonjour عمو ... خ(غ)ا علينا من ألوزي(غ) وخ(غ)ا علينا من ألأسي(غ) وخ(غ)ا علينا لأنو ب7 أيا(غ) كان لازم نبعتهم بألبابو(غ) أو بألطيا(غ)ة عا ت(غ)كيا أو ع قط(غ)أو عف(غ)نسا .(غ)وحة بلا (غ)جعة...

العمر كلّو حاج

العمر كلّو حاج

هول لازم يتسجّلو يا زياد ,

هول لازم يتسجّلو يا زياد , كاسيت , اذاعة , انو شي , ذكرتنا بأيام زمان D:

اجمل مقال انت حقآ شخص رائع

اجمل مقال انت حقآ شخص رائع

زياد طالما إنت هون، الدني

زياد طالما إنت هون، الدني بالف خير . إنت جزء من هويتنا، اي نعم، منحبك ومنخاف عليك، ينعاد عليك زياد وشكراً لأنك هون وهيدا الله إلي خلقك بحبو لئن لما اجا بدو يخلقك كانت رايقة معو وكان مزاجو تمام ...

النسوان كذابين بالخليقة

شو بدك فيها هيدي المطلقة يلي كلها عقد،بتفوتك بفتنة،خذ بقى تعى قيمني،وبعدين المتل بيقول يلي متأمل بالمطلقة بنام تحت الشتي،انو لم خلقت انت كان العالم بألف خير،كان في عدوان ثلاثي ع مصر متل هلق في عليها كمان عدوان مثلث. كل العالم فيها تحب بأي عمر ما حدا صغير او كبير ع الحب،بس لازم يكون مش معرفة ع زعل،المشكلة انو الواحد لازم يطحش ويأخذ نصيبه بالهدينى،طحاش استاذ زياد ولا يهمك،ما بيهم مين قبل ٥٦قريبة كتير من ٥٧ بس الأساس انو يلي بدك تطحش منشانها تكون بتستاهللك،والا بتكون انخدعت متل كل يلي عم يتابعوا أخبار ابن بطوطة الاسير،كل يوم كذبة جديدة وفيلم جديد ع العمى نفسي اعرف بس شو نوع هيدي الأفلام يلي بيحضرها،يلي بتخلي وزير داخلية طويل عريض ما يشوف انو هيدا منو شيخ هيدا مسلح بركي اذا تسلح بشي دبابة بيصير يشوفوا الوزير. حوا كذبت ع ادم وقالتلوا قال من التفاحة مافيها شي،شو مافيها شي ، كلفتها كانت الضرد من الجنة،ولو هي ما انضردت معه شو كان بدوا يعمل على الأرض الواحد فينا بدون كذب النسوان يعني حياة مملة بدون أكشن ،ما بيقولوا انو الكذب ملح الرجال.بس النسوان هنى يلي بيرشوا الملح.منين بدو يخلص اذا البحر كلوا مالح.

welcome back

هاد زياد يللي بنعرفو

العمر كلو

العمر كلو حاج - دخيل صباحك والله يطولنا بعمرك يا غالي

إلى وليد

looooool كتير اويه منك

مو كذبة لأ

اسمحلي قلك أبو الزود إنو رفيقتك بالشغل مو كذابة , هي قالت يلي حاسستو واللي متلك ما بختير لو صار فوق المية , يؤبشني ربك ما احلاك

زياد رجعنا لورا أكتر !!

زياد أيّها الرائع ، تعليق بعيداً عن روعة المقالة .. كنا وما زلنا نتمنى انو كل شي عم نقرأه لزياد الرحباني يكون فينا نسمعه لسببين الأهم بينهما .. انو لما زياد بيكتب الي بدو يقرأ بيقرأ ولازم يدور ع الجريدة (اذا مو بلبنان) او على موقع الأخبار .. فهو مسبقاً بيعرف انو بدو يقرأ "زياد الرحباني" ,, فلو كان كل ما يكتب يسجل ولو بعد حين .. وقتها فينا نترك مجال لكل الناس تسمع .. خصوصاً انو الحمد لله "نحن أمة لا تقرأ" ولا الها علاقة بالقراءة .. وقتها فينا نخلي زياد الرحباني متل أيام زمان يوصل .. لكل مكان .. لكل شارع .. بيت .. لكل شرفة .. وطبعاً لكل "عقل" ..

تعليق

مش معقول ما اجملك يا زياد

ثقيل

ثقيل الدم ولا مرة تحملتك يا زياد. اسلوبك بالحكي والكلام بايخ وجلط. ما بعرف شو بعدك بتهلوس انا رأيي تتقاعد بضهور الشوير وتريح.

غريب كيف بتحور و بتدور و

غريب كيف بتحور و بتدور و بترجع ع هالصفحة ...خيي شو الله جابرك يا ثقيل ... قصدي يا مجهول ...افيا للصفحة و كرمال يللي بتحبن عبفنا من تعليقاتك المهضومة يا... " تقيل ".

يعني ما قلتلنا هيدي البنت

يعني ما قلتلنا هيدي البنت اللي بالجريدة شو وضعها لانو كل شي بيفرق هيك وبكل الاحوال انت هدف لانو احتمال انو ممكن. شي اكيد انو الحريم دائماً بفتشو على عريس ومش مهم اذا كان بال ٥٦ وفات سأقو وسماقو ما الواحد بيرسم حلم عن رامبو وبيصدقو. سوبرمان من عشر سنين لليوم بقيي سوبرمان والبطل بعد الانفجار بوستو مش عادية فيك تقول خارقة للعادة. هني الأميركان عرفو كل شي ومش ممكن يقبلو انو فلان صار عمرو ٥٦ وعم يجر عرباية خضرة. انو من دون ما تقول عنها كذابة ما نحنا متعرف انو هالقد عمرك وانت طفران عا الاخر يعني عفوا عال صراحة بس مش شب، لا شب الله عليك، فيك تقول ختيار ومكتر لأنك طفران. لو معك ٥٦ بتصير سيد شباب اهل المنطقة والمناطق المجاورة وساعتها بتصير فايت بال ٥٧ وبيلبقلك كل شي وبصير عندك معجم للغة العربية كلنا منقلدو حتى لو كان تمك مرخي انت وعم شو عم تحكي وحتى لو فتت بالسبعة ودمتها

تبارك الاله

تبارك الاله

شيخ زياد

وين كان الاسير وين صار؟ كان ما حدا بيعرفوا او بيسمع فيه،فجأة اشترى ارض وعمر جامع ولا يقل عن ٣٠٠مسلح وعدد من السيارات م٥، صار الزلمة معه مصاري بس بلش يشتغل بالدين. احسب مصروفه الشهري مش مدخوله ،كل شب بيقبض ٥٠٠دولار يعني ٥*٣=يعني مئة وخمسون ألف دولار اقل شي ما عدا النثريات،وإذا ضربت حق السيارات والبواريد شوف لوين بتوصل،هيدي التجارة بالله بتربح كتير،. عم فكر اعمل شيخ وبركي انت بتترقى يا زياد وبتصير شيخ وهيك بعدين بتعمر مسرح نزل السرور ،عدة الشغل انك تراقب ماذا يقول سفراء اسرائيل وتردد بعض مما يقولونه ،ًوشوية تحريض وكم نسخة مطبوعة فيها وصية الشباب يلي بدن يموتوا منشان نحنا نعيش.

العمر كلو

تقبرني ع هل هضامه لعمر كلو يأ احلى زياد

أحلا شب!

بس للتوضيح و التنويه و مو لشي:انت خلصت ال ٥٧ و فايت بال ٥٨ العمر كلو... بس أعوذ بالله... انت أحلا شب!

العمر كله يا رب يا كبير

العمر كله يا رب يا كبير بالفكر والفلسفة والكلام الجرئ

زياد ............... كممم...

زياد ............... كممم... اخت هالشغله معكن .. يعني بسبكن زياد وبتقولا حلو- بطعميكمن هوا - وبتقولوا حلو -- بيحكيلكن تحت الزنار وتقولوا حلو - انا مش عم بفهم عليكن مش على زياد - لانو هو واضح وانتوا عندو متلكن متل المرا الصرمايه - بدي اعرف ليش معجبين فيه هو مش معجبين مثلا بالشيخ سمير جعجع..............

متعة

استاذ زياد قراءتك متل سماع موسيقاك متعة من متع الحياة. الله يخليك لهالبلد المعذب حتى نقدر نتفائل بالخير......

الله يخلصنا عن قريب.

الله يخلصنا عن قريب.

ما بصدق انو عمر الحج 56 وفات بل 57

الحقيقه يا حج انا ما بصدق انو انت عمرك 56 متل ما انت ما صدقت انو مروان شربل ما عندو تلفزيون وحقلك السبب ليش عنا بلبنان فيه انت والست صباح ما حدا بيعرف قراركم انا هللا عمري يناهز 50 وبذكر وقت وعيت كان عمري 10 سنين كنت شوفك بالمسرحيات واعطيتك عمر وقتها مينيمو 30 سنه والست صباح نفس الشي وقت كانت امي تاخدني على المدرسه وتجرني بايدها بس ارجع على البيت بيي يحكيلي حكايات انو هوي وزغير كان يسمع اغاني صباح بقى جد انا بحطلك عمر يا حج متل عمر الصبوحه طبعا بدون زياده او نقصان بغض النظر عن عمرك الفني الي هوي يمكن 56 او اكتر بس يا حج ما تتعيب بعمرك خلاص اعترف انو انت صرت ختيار والعمر الو حق بس كرمال الناس تبقى تضحك وشو فيها اذا ضحكت الناس وانت ختيار مثلا مع تحياتي حج زياد

فايت بقلبنا انت

زياد انت مش فايت بال57..انت فايت بقلوبنا..ومش رح نخليك تطلع منها.. ليك ليلة اللي خلقت..الساعة خمسة وش الصبح..كنت سهران أنا..كنت سهران عم اسمع قديش كان في ناس..وقديش نطرونا هالناس ع موقف دارينا..

اضف تعليق جديد

محتويات هذا الحقل سرية ولن تظهر للآخرين.
Comments are limited to a maximum of 250 words.
CAPTCHA
This question is for testing whether you are a human visitor and to prevent automated spam submissions.
3 + 1 =
Solve this simple math problem and enter the result. E.g. for 1+3, enter 4.