شي أكيد طبعاً، انا مع إنك تفكر لبعيد... فكّر لبعيد بس إنتَ خلّيك هون... لانو صراحة إلك فترة، من من وقت ما بلّشت تفكّر لبعيد، نحنا اللي هون يعني وكلنا صدقني، عم نفقدلك... ما بعرف... إنتَ مضطر تفكّر لبعيد؟!

■ ■ ■


أكيد إنو الديمقراطية شغلة ممتازة ومريحة لإلك. شغلة لذتها إنو إنت بس تربح الانتخابات وحكماً تحكم، ما بيعود يهمك لا الحكي ولا الاعتراض، لي؟ لأنو بيصير عندك اشيا أهم: الحرية، الحرية الشخصية، حرية التعبير، الغرافيتي، الشفافية، المصداقية وبعدين... تكافؤ الفرص، العدالة الاجتماعية أهم شي هاي!! العدالة بالتوزيع، الوقوف على مسافة واحدة من الكلّ وكتير كتير إشيا أهم من الحكي،... التنمية المستامة، مكافحة الهدر، تحييد القضاء ونزاهتو، هاي وحدها شغلة، شو بيهمّك الحكي والناس اللي عم تحكي، اتركها تعبّر تمارس حريتها ما دام حريتها لالها!! شو بيأثّر؟ حريتك انت لوَحدْ! شو لكان ما عندك تحييد الجيش وعدم تسييسو وتحييد المقامات الدينية واحترام الأديان جميعاً، وبعدين في تحييد شخص الرئيس!! وإنتَ الرئيس، فمتلك متلن أكيد، أقل شي هيدا... يعني الحكي والاعتراض ما لازم يهمّك، ما بيكفي إنك مسامحو؟ وعاطي حرية الرأي والتعبير وإنت بتعرف إنو التعبير ما بيأثّر!... ليك مثلاً الفلسطينيين قدي صرلهم عم بيعبروا؟ ليك الأفارقة! شو صار؟ ولا شي! إذن التعبير لوحدو مش كافي فما في خوف!

■ ■ ■


اخترع التلفون اللي بدك اياه، اخترع السيارة اللي بتشوفها بعد ما في منها (ومش ضروري يكون!!) اخترع لغة جديدة للجسم، للرقص، اخترع فستان بيشبه الشروال وشروال بيشبه التنورة وصدرية بتشبه النملية... اخترع بيانو بيدق الدقات لوحدو طبعاً من بعد ما إنت تكون دقيتهن عليه، بس إنت طبعاً رح تبيعو بعد ما إنت تخلّص دق، لأنو الاختراع بيقول إنو البيانو هيدا بيدق وحدو، إنما في إشيا ما تقرّب عليها، لأنها صعبة تقدر تعمل معها شي: الهوا مثلاً... إنت ما رح فيك تغرّق الهوا بالمي... جرّب تغرّق حنجور فاضي وما في إلا هوا.. واتسلّى إنت واياه، انو تا يغرق راحت لعبكرا.. وطبعاً المي كمان، جرّب تطيّر المي جرّب تعلّي البحر... تعلّي البحر؟!!! معقول ولاه تعلّي البحر بالجو؟! ما لقيت إلا هول تتحركش فيهن؟!! حرام والله حرام ضياع وقت...

■ ■ ■


Allah aime les Bienfaisants!
هاي الجملة يعني: «كان الله يحب المحسنين» بس بالفرنسي... هاي لأنو الإسلام الفرنسيين المحسنين كانوا ناطرين ليعرفوا إذا الله بيحبهن كمان والا ما كتير داير بالو عليهن لأنهن فرنساوية اسلام مش عرب.... عرب وبدهن يلبسوا حجاب بفرنسا!