خالي تماماً
من الآهات
قد كان عاماً مليان سكات
لا حد ساوم
ولا حد قاوم
ولا حد مات
ولا العدوة ضربت بقوة
مستشفيات
عبد عابدي ــ «جدار وكوفية» (مواد مختلفة ونسيج وأكريليك على كانفاس ــ 89.5 × 79.5 سنتم ــ 2005)
لا ليل بنفزع
ولا نور بيقطع
على حضانات
قد كان عاماً تافه وعابر
فتح المعابر للشاحنات
ولا أي حاجة حصلت قصادنا على الشاشات
ولا المراسل
ببدلة واقية
وأهله ماتوا
بيعدّ شهدا بعد الغارات
قد كان عاماً مالوش صلات
بأي عامٍ من اللي فاتوا
لا ليه أغاني ولا أماني ولا ليل وعين
ولا دنيا كالت بمكيالين
قد كان عاماً حضر وولى
لا رفعنا فيه في ميدان مسلة
ولا سبنا معبد ولا أهرامات
قد كان عاماً
ضاحك وعابس
خالي تماماً من الحوادث
في وسط حركة كل الحاجات
واقف ثبات
قد كان عاماً
وكان عصراً
عصرنا عصراً
وسابنا أطرى من النبات.
* شاعر مصري ابن الأب المؤسس لشعر العامية المصرية فؤاد حداد (1928 ـــ 1985)