«الهيئة هيدا واحد خسر حصانو بالسبق، قام قطع الطريق، إنو ع أساس تزوير!»، يقول الشاب الذي سألته «شو القصة» حين بدا لي أن الطريق، طريق سبق الخيل المجاورة لمنزلي، مقطوعة تماماً، ما أصاب بالأزدحام غير الطبيعي بقية شرايين المنطقة التي غصّت فعلياً وحرفياً بالسيارات المحوّلة عن الأوتوستراد. هكذا، توقفت السيارات خلف بعضها، هامدة دون حركة، كأنها متوقفة في مرأب، لا فرق بين «مموّهة» آخر موديل، أو «مخلعة».. لم يعد لموديلها من وجود في السوق، في حين انهمر السباب على «الدولة» و«الشعب الصرماية» وانتشر الدرك وعناصر من الجيش وقوى الأمن الداخلي يحاولون تيسير الأمور. «يا عمي شو الموضوع؟»، لم يستطع أيّ من السائقين المتوقفين متجهّمين دون حراك أن يجيبني. لا بل إن أحدهم حين سألته نظر إليّ نظرة مليئة بالغضب وكبس على زر الزمور تلك الكبسة الطويلة التي تشبه المسبّة. مشيت حتى باب مدخل ميدان سبق الخيل، حيث بدا أن مركز «التحرك» كان هناك. وإذ بجيبات مموّهة الزجاج قطعت طريق الأوتوستراد بالاتجاهين، وفي حين بدت الطريق قبل السبق مرأباً كبيراً لا نهاية له، بدا النصف الثاني من جهة البربير ميداناً فارغاً كما في منع التجوّل. أمام مدخل ميدان السبق تجمع رجال كثيرون. معظمهم من «السبقجية». ما الموضوع؟ يقترب مني أحدهم، وقد ارتدى بدلة وكرافات ووضع على عينيه نوعاً من نظارات شمسية، بدا وكأنها رُسمت رسماً على وجهه لشدّة التصاقها به، يقول وقد كوّر يده أمام وجهي علامة التريّث «مدام، أنت صحافية ما هيك؟ عال.. الموضوع إنو بمجلس إدارة السبق في منصب لأهل السنّة (يشدد عليها)، ولعكار تحديداً. توفي شاغل المنصب، الله يرحمو، ولكن نبيل فريج (تعمّد أن لا يلقّبه بلقبه المركيز دو فريج) اللي ما عندو إلا حصان واحد بالسبق(!!) بدو يحطّ شخص تاني محسوب ع رئيس الجمهورية قال.. لكننا (هنا بدأ يصيح كمَن يخطب على منبر): لن نسمح بذلك، هذا المنصب للسنّة ولأهل عكار ولن نقبل»، يقول بلهجته العكارية القحّ، وقد احمرَّ وجهه تحت الشمس الحادة التي تتناوب علينا هذه الأيام مع العواصف.
أسأله: «ما فهمت، كيف لأهل السنّة يعني؟ هل هناك نص بالقانون الداخلي؟»، يجيب حانقاً: «شو نص ما نص؟.. معروفة باتفاق الطائف!.. هيدا المنصب للسنّة»! أتمالك نفسي من الضحك وأسأله بجدية: «آه.. يعني اتفاق الطائف بيحكي عن مجلس إدارة سبق الخيل؟»، يستفزّه السؤال برغم اللهجة التي تعمّدتُ أن تكون «علمية» محايدة. يقول « شو لكن؟ معروفة! رئيس الجمهورية للموارنة والبرلمان للشيعة ورئاسة الوزراء للسنّة.. وكمان بالدولة، معروفة.. سبعة وسبعة مكرر!.. ليش هون لأ؟ لأنو لأهل السنّة؟ ما رح نسمح! المنصب من حق الأستاذ (فلان الفلاني)».
وإذ.. بفلان الفلاني شخصياً يصل الى «الجَمْعَة»، فيوسعون له، يعرّفوه علينا فيقول «مدام أنا عندي اسطبلات بعكار ما بتاكلها النيران. معقول يجيبوا واحد تاني؟ أصلاً هوي فريج شو خصّو بالجياد العربية؟»، ثم يلتفت إلى الجمع المتجمهر حولنا صائحاً: «هذا المنصب لعكار وما رح نسمح يتّاخد منّا..». أشكره على التوضيح وأهمُّ بالمغادرة، فإذ بأحد أعوانه (إذ تبيّن أن الرانجات التي تقطع الطريق والمموّهة هي له) يلحق بي ويعطيني بيانا توضيحيّاً للقضية.
بغضّ النظر عن اللغة العربية التي صيغ بها البيان، غير المستخدمة، ربما، إلا في جرائد السبق (هبّت /آخر ساعة/ معليش)، يقول البيان ما يلي: «جئنا اليوم إلى الميدان للحدّ من التهميش التي تعرّضت له منطقتنا منذ أن استلم نائب الأقليات الميدان، وقد جاء به الرئيس الشهيد رفيق الحريري إلى الندوة البرلمانية (...) وليس بكفاءته، بل ورثه عن المركيز موسى فريج، وعمل على محاربة المنطقة المحسوبة على الرئيس الشهيد، فعمل على تشريع الخيول السورية المروّضة وتهريب إنتاجها إلى لبنان، إلى أن وصلنا إلى 70 بالمئة من خيول الميدان (..) أبدل المربي اللبناني بالمربي السوري وسكّر مزارعنا وجلب لنا مرض «الريعام» وأول الاعترافات من مزرعته، وجرّدنا من تراثنا، واليوم يحاول تجريدنا من كرامتنا وكرامة «الطائف» وتهميش الفاعلين في «الطائف» من دورهم (!!)، وبالصدفة لا بقصد، حسب قوله، أتى بالصديق محمد القطامي أول مرّة بطلب من الرئيس سعد الحريري وبالصدفة يريد أن يأتي بالثاني بطلب من فخامة رئيس الجمهورية، كما يدّعي، لأن هذه المراكز السنية هي للمجاملات أو للهدايا». ويضيف البيان: «وبالصدفة لم تجتمع جمعية المُلّاك منذ وفاة الوزير بيار فرعون، ألِأَنَّ رئيسها سنّي؟؟»، ويجيب: «الأصحّ هو أن نائب الأقليات هو مَن يأتي بأعضاء الجمعية العمومية والإدارية على أساس شهادة حسن السلوك التي منحها والتي يجب أن تكون من أزلامه». ويختم البيان بمناشدة كلّ من سليمان وبري وميقاتي وسلام وسعد الحريري معالجة هذا الموضوع «بالطرق التي يرونها مناسبة لحفظ كرامة الطائفة من نائب الأقليات».
هكذا إذاً، دبكت طائفياً بالسبق؟ حتى هنا تسود صيغة 6 و6 مكرر؟ لم أكن أعلم أن الطائفية «بتلعب بالسبق». لكن يبدو أنها تلعب، ولا شيء يمنع لعبها وفوزها المضمون، طالما أن الكبار يستخدمونها باسم قضايا الوطن الكبرى.
ولذلك، ومن الآن فصاعداً، سيصبح لدينا ميدان سبق للخيل ذو نظام فريد في العالم، نظام قائم على التوازن بالمناصب بين المذاهب، أي أنه، وبلغة السبقجية: «إذا ما إجا ظالم؟ إيه ربّ ربّك ما رح يجيبها لجربوعة».
سؤال
مجهول - 4/28/2013 6:08:35 PM
هيدي القصة صايرة عنجد ؟؟ ولا قصدك فيها استعارات ورموز ؟؟
انقر للتصويت |
رد لصاحب السؤال
مجهول - 4/29/2013 1:30:52 PM
كيف يعني رموز؟ عم نحكي شو صار قدام سبق الخيل. يعني هاي شاهد عليها ما لا يقل عن مئة شخص! كيف استعارات؟ قصدك تقول ما بيتصدق؟ ايه.منشان هيك كتبنا.. مودتي ضحى
انقر للتصويت |
ايه ما بتتصدق !!!
مجهول - 4/30/2013 6:19:24 PM
انو يا حراااااااااااام كيف انتو عايشين !!! معقولة !!! بجد مو معقول
انقر للتصويت |
اللبنانيين خبراء بالطائفية!!
مجهول - 4/27/2013 3:07:33 PM
يعني بالوضع الذي تمر فيه المنطقة العربية , والصراعات الطائفية والمذهببة في أكثر من بلد , يستطيع لبنان أن يقدم خدمات لهم بالطائفية والمذهبية , كيفية قوننتها وآليات تطبيقها ,,,
انقر للتصويت |
بخالفك الرأي
مجهول - 4/29/2013 10:37:05 AM
يعني نظرة بسيطة على الوضع بالبلد وتاريخ البلد وحروب البلد وطائفية البلد، ما بعتقد أي بلد عنده تعدد طائفي راح يرغب يستفيد من خبرة لبنان بهالموضوع... اللهم إلا إذا حبوا يعرفوا شو عمل لبنان تيعملوا العكس تماماً :)
انقر للتصويت |
اللاتين
مجهول - 4/27/2013 12:09:45 PM
ما ناقص السنة الا اللاتين و الاقليات الله اكبر. الله اكبر
انقر للتصويت |
الطائفية «بتلعب بالسبق»
مجهول - 4/30/2013 12:51:11 PM
فعلا الأقلية السنية في لبنان مهدور حقها كما في كل الوطن العربي وهذه الطائفة المعترة لا حامي لها ولا ناصر لولا العرعور والأسير والضاهر والمرعبي والرافعي والجوزو ويا عيني عليهن وعالسبق. سنية قرفانة
انقر للتصويت |
مقال ممتع كالعادة ضحى...
مجهول - 4/27/2013 12:29:04 AM
مقال ممتع كالعادة ضحى... تحياتي من نيو يورك
انقر للتصويت |
لازم يدرجوا مرض الطائفية
مجهول - 4/25/2013 11:49:47 PM
لازم يدرجوا مرض الطائفية اللبنانية في عِلم النفس، وهيك بصير التشخيص لهذا المرض رسمياً وعالمياً. خلّينا يا جماعة نصوت < طائفياً ـ:) > على هيدا الموضع. الله يساعدنا لوين نرح نوصل بهالبلد. بقول المتل: يللي مِن إيدو الله يزيدو. ونحنا بلبنان علينا كلنا الحق من يللي عم يصير فينا. ليلة سعيدة للسيدة شمس وكل القراء. حنّا الراعي \ لبناني في المانيا.
انقر للتصويت |
أنا رأيي يا جماعة نجيب حصان
مجهول - 4/25/2013 7:40:39 PM
أنا رأيي يا جماعة نجيب حصان على هالمنصب. من عكّار، ليش لا، إذا الشباب أصّروا ع المنطقة. المهم يكون حصان ذهنه صافي ومركّز. والنبي تبسّم
انقر للتصويت |
ودخلِك مافي حصان سني وحصان
مجهول - 4/25/2013 1:52:15 AM
ودخلِك مافي حصان سني وحصان شيعي وحصان من الأقلّيات كمان في مزرعة الطوائف ؟ عفوا قصدي مزرعة الأحصنة !!! ويازمان الطائفية.. بس برافو قدرت تكملي الحديث معهم ولو كنت مطرحك كنت فتت بضحكة هستيرية ودّوني فيها ع العصفورية أكيد ورده
انقر للتصويت |
حصان قمرجي
مجهول - 4/25/2013 12:51:15 AM
مرة احتجت لخدمة وكوني،مش مع ولا زعيم،وما حبيت روح عند ولا واحد منن،من اجل قضاءها،نصحوني اطلع ع عكار ع اساس في واحد هونيك ايدوا واصلة لكل الناس،وصلنا ع المنطئة،ودفعنا يلي في النصيب،وبعد فترة ما صار شي بالخدمة،فحكيت لصاحبي ضحك وقلي حدا بيدفع ل قمارجي،ليش من ايمتى القمارجي عندو دين، ليش حدا بيعرف دين القمارجي،طلع الحصان قمرجي وصاحبه.
انقر للتصويت |
الطائفية "بتلعب بالسبق": يا لطيف صرنا باخر وقت!
مجهول - 4/24/2013 8:48:35 PM
يا عمي معقول هالحكي؟ انا اعرف ان الدين الاسلامي دين سمح ومتسامح. بس ما كان عندي خبر انه لهالدرجة! والله فاجأتونا موووووو!! هلق القمرجية ولعيبة سبق الخيل كمان صاروا يحكوا بالدين وبالسنة وبالستة والسبعة مكرر؟ مع انه الصحيح وفي هذه الحالة فانه وبما انهم من عكار ومزاجهم معكر فان القانون يجب ان يحمل اسم سبعة وسبعة معوكر. يعني ما بين جهاد النكاح وقطع الرؤوس وقمرجية ظالم ودعاس وقناني نبيذ الحريري والباستا والسيجار الكوبي الفاخر وهدم بيوت ومقامات النبي والصحابة في جزيرة العرب ومع زيارات الحاج سمير جعجع المتكررة لارض الحجاز وقيادته الحكيمة لاهل السنة والاعتدال لم يبق من هذا الدين شيئا يذكر. يللا شدوا حيلكم ولاقوا لنا حلة مع صيام الثلاثين يوم والصلوات الخمس مع انه فينا نكون متحضرين واميركان على اصوله ونعتبر الصوم والصلاة ريجيم ويوغا. وعلى فوقة ممكن نصير نحج في مالطا؟ الطقس هونيك الطف شوي. بس اذا ممكن وطبعا بدون ان يغير ذلك اي شئ في شعائر الدين. كنا نسمع باخر وقت بس الظاهر اننا (واخيرا) وصلنا له وصرنا باخر وقت واجت الساعة. بس اي ساعة تقريبا؟ ما حدا معو خبر. لذلك: http://www.youtube.com/watch?v=TYcgQfIEFU0 اخوكم المتفاجئ موووووو عمر
انقر للتصويت |
بشر بقر
مجهول - 4/24/2013 8:17:11 PM
لو الأحصنة بتلعب سبق بالبشر كان أشرف للصنفين!
انقر للتصويت |
الحصان المؤمن
مجهول - 4/24/2013 7:40:24 PM
أتمنى أن تصفي لنا خصائص الأحصنة الشيعية والسنية والمسيحية عشان نفهم مين بدنا نشجع عشان ما بيصير نشجع حصان ويطلع آخر شي تابع "للتانيين" مع فائق الإحترام...ممانع حزين
انقر للتصويت |
مرض الريعام
مجهول - 4/24/2013 6:01:54 PM
هاها! ماركيز دو فريج و ما أدراكم و أدراكن من هو دو فريج! المهم إنو مرض الريعام ما يصيبو و يصيب ميشال فرعون! يا ست ضحى شو بدك تحكي تتحكي! معقول بلد بوظف أساتذة الجامعة اللبنانية على أساس مذهبي؟ في جهل أكتر من هيك! يعني بالسبق القصة محصورة بكم مسابقجي بس بالجامعة القصة بتمس مئات الآلاف على مر السنين! و بس بدك منعطيكي تفاصيل! ت.
انقر للتصويت |