(يا-وي لي ــ الصين)
الخط
بكاك شقاك ومعدهشي له قيمة
ماهو اللي سال منك ده لم يتحس
صمتك وجودك كالنيران القديمة
قرآن في لوح محفوظ ولم يتمس
... ...
قالولي اكبت دا ما باليد حيله
تخلد ملامحك إما تكبت
الزق عيونك دا الجفون واهنة وهزيلة
واوعاك قناة الدمع تفلت
... ...
بروح محارب
اشتريت شيكارة جبس أبيض
وأنابيب غرا إفرنجي مستورد
وابتديت أعمل تجارب
عالعيون والجفن
... ...
حصل اللي كنت حاسس بيه وخايف
صحيت الصبح مش شايف
وانتفخ فكي بشكل عجيب
صبح أقرب لفك الديب
هل فيه أمل في رجوعي؟
مبقتش عارف
ندمت على طاعتي وخضوعي
وفضلت أعوي وأعوي
اعووووه ...
اعووووه...
ونمت باعوي!
بوجع في حلقي رهيب
لكن صحيت الصبح مستقوي
وبدأت أتقيأ دموعي.
* مصر ــ (8 نوفمبر 2022)