فيلم أميركي طويل

- أنا عرفان بدُن يقتّلونا. بدُن يخفوا أثرنا. محمودات كلن.
- لك ما حدا بدو يقتلك. هودي عُملا. هون وهونيك. كل الّلي عملو الطّائفيّة
_ كيّف عُملا دكتور؟
- عُملا الأميركان، يعني هني مشوها طائفيّة حسب المخطّط ما المخطّط أميركاني.
- يعني هلّق الوالدة عم تقبض من الأميركان؟
- شو دخل الوالدة؟
- الوالدة خيّي مثلاً نصارى ما بتأجر، ما تبحث، يعني كلو ولا النصارى، وما على علمي بتقبض من الأميركان... بالعكس أنا اللي بعرفو إنّو ألها مواقف ضد الأميركان الوالدة.
- هلق في ما بقلك، هالجيل القديم بعدو هيك، متخلف شوي بعقليتو.
- ليش والجيل الجديد كيف شايفو حضرتك؟
- شبو الجيل الجديد؟
- الجيل الجديد يا ريّس، ولاد أختي تنين ئرائير هالقد، بالبورة خيّي بطلوا يلعبو أبطال حرامية، اللعب كلو هلق إسلام مسيحيّة. وهيدا الصغير ربيع بيعمل مسيحي دايماً، أي بضلو ملقح بالأرض. عم قلك واللهِ قبل ميقوسو، حمودي بتلاقيه قلب وبيقلب وعلى قلبو متل العسل أي والله.
- لك منيح هلق إن كان هون ولا هونيك في طائفيّة.
- ولشو عم تقلو للزلمة ما في طائفية!
- لأنو ما في طائفيّة لأنو في طائفيّة، لأنو لأنو بالطائفيّة عملو مؤامرة مهيّاها في مؤامرة عالطائفيّة، هالدول الكبيرة علينا متفقين بين بعضون الجماعة، فهمت كيف إدوارد؟
_ ما فهمت شي!
- روح لمحلك لكان.

* (من «فيلم أميركي طويل» ـــ 1980)